Rojnamevan Nazim Daştan û Cîhan Bîlgîn di 19’ê Kanûna 2024’an de li Bakur û Rojhilatê Sûriyeyê di encama êrîşa SIHA’yên dewleta Tirk de şehîd bûn. Di 20’ê Kanûna 2024’an de jî têkildarî her du rojnamevanên şehîd li Amedê daxuyaniyek hate dayîn. Derheqê çar rojnamevanên ku beşdarî daxuyaniya berbehs bûne de lêpirsîn hate vekirin û ji wan hatiye xwestin ku biçin îfadeyên xwe bidin.
Şaxa Ewlehiyê ya Midûriyeta Polîsan a Amedê ji Hevserokê Komeleya Rojnamevanên Dîcle û Firatê (DFG) Selman Çîçek, nûçegihana Ajansa Mezopotamyayê (MA) Heval Onkol û rojnamevan Dîlan Kartal û Hêvîdar Onverê xwestiye ku werin îfadeyê bidin. Derheqê rojnamevanan de bi hinceta ‘’muxalefeta li dijî qanûna xwepêşandan û civînan’’ lêpirsîn hate vekirin.
Hate ragihandin ku rojnamevan Selman Çîçek û Heval Onkol di çarçoveya lêpirsinê de îfadeyên xwe dane û rojnamevan Dîlan Kartal û Hêvîdar Onver jî wê sibehî îfadeyên xwe bidin.
Rojnamevanên ku îfadeyên xwe dane, anîn ziman ku wan ji bo rojnamevanên hatine qetilkirin daxuyanî daye û ev yek jî mafê wan ê qanûnî ye.
