Nivîsgeha Têkiliyan a MSD’ê civîna xwe ya salane li bajarê Hesekê li dar xist. Di civînê de hevserokê MSD’ê Mehmûd El Mislit û hevserokên nivîsgehê beşdar bûn. Her wiha nûnerên nivîsgehên li derve jî bi rêya Zoomê beşdar bûn.
Civîn bi rêzgirtinê dest pê kir. Piştre hevserokê MSD’ê Mehmûd El Mislit axivî û diyar kir ku Sûriyeyê di pêvajoyeke hestiyar re derbas dibe û diyaloga navxweyî jî wekî rêya yekane ya çareseriya siyasî û aramkirina Sûriyeyê nirxand.
Piştre rapora sala borî ya xebatên nivîsgehê hat xwendin. Hevserokê Nivîsgeha Têkiliyên Giştî ya MSD’ê Hesen Mihemed Elî rewşa siyasî nirxand. Hesen Mihemed Elî bal kişand ser peymana 10’ê Adarê û got: “Ji bo ku Sûriye nekeve nava çiravek din a aloziyê peymana 10’ê Adarê hat îmzekirin. Tiştên ku me li peravê dîtin sînyalek bûn ku Sûriyeyê ber bi aloziyek din ve diçe. Peymanê ew şer sekinand û me gavên din avêtin. Em dixebitin da ku diyalogan bi ser bixin.”
Hesen Mihemed Elî anî ziman ku Sûriye di pêvajoya damezirandinê ye û ev li gotinên xwe zêde kirin “Eger em îro ne li Şamê bin em ê nikaribin rola xwe di Sûriyeya nû de bilîzin. Divê em stratejiyên nû ava bikin da ku rola xwe ya rasteqîn di Sûriyeya siberojê de bilîzin.”
Mihemed Elî diyar kir ku tevahî gelê Sûriyeyê wekî hêzkek mezin li MSD û Bakur û Rojhilatê Sûriyeyê dinêrin nemaze piştî bûyerên li peravê û başûr û got: “Berpirsyareke mezin diekve ser milê me da ku Sûriyeyê ber bi aramiyê ve bibin. Divê em giraniyê bidin şerê li diî terorê. Divê destûreke nû were avakirin û beşdariya siyasî ya tevahî hêzan were mîsogerkirin.”
Beşdaran jî li ser mijarê nêrînên xwe anîn zimanê. Piştî nîqaşkirina rewşa siyasî, civîn ji ragihandinê re girtî dewam kir û rewşa rêxistinî hat nîqaşkirin.
Di dawiyê de nivîsgehê stratejiyên hundirîn û derve ku dê sala 2026’an li ser kar bike diyar kir. Ji wan: Xebat ji bo yekkirina helwestê bê kirin, torên peywendiyên were berfirehkirin, dosyayên lihevhatina civakî bi rêya avakirina komîteyên pispor ên ji bo rawestandina nakokiyên navxweyî were şopandin, piştgiriya diyalog û peymana 10’ê Adarê, pêşxistina têkiliyan bi dewletên derve û yên aktîf di dosyaya Sûriyeyê de.
