‘Konferansa Parlamenterên Jin ên Kurd a 1’emîn’ ku Tevgera Jinên Azad (TJA) pêşengiyê jê re dike, li Amedê bi dirûşma ‘Em siyasetê demokratîk bikin, civaka demokratîk ava bikin’ tê lidarxistin. Konferansa ku 28’ê Gulanê destpê kir, wê 2 rojan dewam bike. Ji Kurdistan, Rojhilata Navîn û Ewropayê gelek parlamenterên jin ên Kurd beşdarî konferansê bûn.
Ji beşdarên konferansê Parlamentera Mêrdînê ya DEM Partiyê Salîha Aydenîz anî ziman ku konferans bi beşdariya jinên ji çar aliyên Kurdistanê û dîasporayê pêk hat. Aydenîz diyar kir ku ev konferans ji bo parvekirina tecrûbeyên jinan ên bi nasnameya Kurd têdikoşin girîng e.
JINÊN KURD BI DU QATÎ ZEXTÊ DIBÎNIN
Aydenîz anî ziman ku li ser temsîliyeta jinan a li parlamentê û têkoşîna li dijî serweriya mêr nîqaşê dikin û diyar kir ku jinên Tirk jî li heman zextan rast tên. Aydenîz got, “Li cîhanê jin ji ber nasname û zayenda xwe timî li tundî, zextê rast tên, tine têne hesibandin û îradeya wan nayê naskirin. Em jinên Kurd hem ji ber jinbûyîna xwe hem jî ji ber Kurdbûna xwe du qatî li vê zextê rast tên.”
‘KONFERANS JI BO SAZÎKIRINA TÊKOŞÎNÊ GIRÎNG E’
Aydenîz bi dewamî got, “Di vê demê de li hemberî rejîmên faşîzan û tekperest ên li Rojhilata Navîn, sîstemên azadîparêz ên jinan mînak in. Lewma Rojava mînak e. Felsefeya ‘Jin, Jiyan, Azadî’ li xaka Rojava bi pêş ket û îro li tevahiya cîhanê bûye modeleke rêxistiniyê ya sûdwergirtinê. Ti ji me bi pêşketina xwe ya şexsî nehat parlamentê. Bi saya têkoşîna bi salan a tevgerên jinan em îro li wê derê ne. Ji bo veguherîn, hevparkirin û sazîkirina vê têkoşînê, ev konferans gelekî girîng e.”
‘DI TÊKOŞÎNA AŞTIYÊ DE PÊŞENGIYA JINAN GELEKÎ GIRÎNG E’
Aydenîz ragihand ku banga aştî û civaka demokratîk yek ji rojevên bingehÎn ên konferansê ye û got, “Di avakirina civaka demokratîk û aştiyeke bi rûmet û mayinde de pêşengiya jinan gelekî girîng e. Jinên li dîasporayê û parlamentê çawa dikarin pêşengiyê ji vê pêvajoyê re bikin, vê têkoşînê çawa dikarin li nava civakê belav bikin; ev jî yek ji sernavên girîng ên nîqaşên li vê konferansê ye.”
Salîha Aydenîz herî dawî anî ziman ku karên TJA’yê parçeyek ji têkoşîna azadiya jinê ya yekbûyî ye û got, “Em weke jinên Kurd li her cihê ku lê ne hewl didin destketiyên gelê xwe bi nêrîna jinê biparêzin û mezin bikin. Ev konferans jî li gel hîmê xwe yê siyasî ji bo pêşengiya jinê ya di têkoşîna azadiyê ya Kurdan de gaveke girîng e.”
‘JI BO PARVEKIRINA TECRÛBEYÊN XWE EM LI VÊ DERÊ NE’
Parlamentera ji Başûrê Kurdistanê Mahabad Mihemed jî beşdarî konferansa jinê ya li Amedê bû û tecrûbeyên xwe parve kir. Mihemed diyar kir ku konferans platformeke girîng e ku mijarên aştî demokrasî û yekîtiyê dide pêş.
Mihemed anî ziman ku di têkoşîna demokrasî û aştiyê ya li Bakurê Kurdistanê de rola jinê her tim li pêş bû û got, “Îro jî ev têkoşîn dewam dike. Weke jin ji bo parvekirina van tecrûbeyan û guhdarîkirina li hev em li vê derê ne.”
Mahabad Mihemed destnîşan kir ku ji bo jin hîn bi çalak tevlî mekanîzmayên biryardayinê û parlamentê bibin konferans girîng e û got, “Hêvîdar im encamên erênî yên konferansê wê hem bi kêrî jinên li Bakurê Kurdistanê hem jî jinên li Başûrê Kurdistanê bê.”
‘ENCAMA KONFERANSÊ WÊ YEKÎTÎ BE’
Mihemed destnîşan kir ku aştî ji bo jinên Kurd armanca hevpar e û got, “Konferansa li Amedê tê lidarxistin di heman demê de wê zemîna yekîtiyê xurt bike. Jin wê tecrûbeyên xwe yên li ser demokrasiyê û têkoşîna siyasî li vê derê vebêjin. Ev têkoşîn ji bo me hemûyan gelekî girîng e. Ji bo vegotina pirsgirêkên me û peydakirina çareseriyên hevpar em li vê derê ne.”
