Komên çete yên ku dewleta Tirk piştgiriyê dide wan, êrişên xwe yên li ser taxa Şêxmeqsud didomînin. Çete herî zêde jî nexweşxane û welatiyan dikin hedef.
Yek ji cihên ku ev 2 rojin bûye hedefa êrişan jî, Nexweşxaneya Xalit Fecir e. Nexweşxaneya ku şevê din 4 caran hat bombebarankirin, îşev careke din bû hedefa topbaranê.
Di dîmeneke ku ji hundirê nexweşxaneyê hatiye kişandin de, tê dîtin ku gelek nexweş hene, her wiha malbatên nexweşan ên wekî zarok, jin û pîr jî hene. Di rewşek wiha de çete êrişên xwe didomînin.
BIJÎŞKÊ NEXWEŞXANEYÊ BANGA ALÎKARIYA LEZGÎN KIR
Bijîşkê Nexweşxaneya Şehîd Xalid Fecir a taxa Şêxmeqsûdê Welat Mamo diyar kir ku ji duh ve 6 car in nexweşxane tê topbarankirin, divê demildest êrişên li dijî sivîl û nexweşxaneyê rawestin, her wiha bang li rêxistinên navneteweyî kir ku şêniyan biparêzin.
Welat Mamo bangek lezgîn ji bo parastina nexweşxane, birîndar û xebatkaran kir.
Komên çete yên hikumeta demkî Nexweşxaneya Şehîd Xalid Fecir weke hedefek leşkerî îlan kiribû, ev jî delîlekê aşkera ya pêkanîna komkujiyan e.
Nûçegihanê me ji taxê diyar kir ku nexweşxane cara 5ˊan jî bi dijwarî hat topbarankirin.
