Rojnamevan û çavdêrê siyasî Kawêz Mela Perwîz, li ser metirsiyên berfirehbûna dagirkeriya artêşa Tirk bi alîkariya PDK’ê, komploya Tirkiye û PDK’ê ya li dijî her du parêzgehên Kerkûk û Nînowayê, dijberiya Tirkiye û PDK’ê ji bo danîna parêzgarekî Kurd li Kerkûkê û dijberiya wan li hember Kurdan bi giştî û Kurdên Kerkûkê bi taybetî û çend mijarên têkildarî van mijaran fikrên xwe ji ANF’ê re anî ziman.
Têkildarî dagirkirina axa başûrê Kurdistanê ji aliyê dewleta Tirk a dagirker ve, Kawêz Mela Perwîz wiha got: “Pêwîst bû gelê Kurd bi yekdengî li dijî hatina artêşa Tirk a dagirker rawestiyaya, lê mixabin me yekdengî nedît li dijî dagirkeriya Tirkiyeyê, berevajî, Tirkiyeyê bi hêsanî herêmeke mezin ji Herêma Kurdistanê dagir kir.”
Her wiha Kawêz Mela Perwîz amaje bi hewldanên Tirkiyeyê kir ji bo dagirkirina Kerkûkê û wiha domand: “Dagirkeriya Tirkiyeyê tenê bi dagirkirina çend herêmên Herêma Kurdistanê nesekiniye, demeke dirêj e dewleta Tirk a dagirker li ser Kerkûk û çend herêmên din kar dike û ajandayeke Sunnî ava kiriye ku mixabin beşek ji Kurdan jî bûne beşek ji vê ajandaya Sunnî ya Tirkiyeyê, em dibînin li Kerkûk û herêmên din ên Kurdistanî xwestin ajandaya xwe pêk bînin û dest daynin ser desthilatdariya bajaran, wekî ku me di heft salên borî de li Kerkûkê dît, balyozê Tirkiyeyê wek bajarekî Tirkiyeyê li Kerkûkê dinêrî.”
Di berdewamiya axaftina xwe de li ser hewldanên Tirkiyeyê ji bo pêkanîna ajandayên xwe li Kerkûk û Neynewayê, Kawêz Mela Perwîz got: “Diviya Hikûmeta Iraqê destûr nedaya ku Tirkiye wê rolê bilîze li ser van her du bajarên girîng ên Iraqê û çawa bixwesta bi wî awayî rêveberiya bajaran ava bikira. Em dibînin Wezîrê Karên Derve yê Tirkiyeyê eşkere dibêje ‘divê avakirina rêveberiya xwecihî ya Kerkûkê bi awayê dorê be di navbera pêkhateyên cuda de’. Her wiha Iraq divê rê li ber wan hêz û aliyan jî bigire ku ajandaya Tirkiyeyê bi cih tînin.”
Kawêz Mela Perwîz her wiha ev tişt anîn ziman: “Wezîrê Karên Derve yê Tirkiyeyê eşkere dibêje ‘Divê avakirina rêveberiya Kerkûkê bi dorê be’, bi gotineke din Wezîrê Karên Derve yê Tirkiyeyê xwe wek damezrînerê avakirina rêveberiya Kerkûkê dibîne. Divê vî mafî nedin Tirkiye û hêz û aliyên girêdayî Tirkiyeyê. Metirsiya dagirkeriya Tirkiyeyê gelek mezintir e ji ya ku tê dîtin. Ev dagirkeriya Tirkiyeyê li ser Rojhilata Navîn çi qas metirsî be, ew qas jî metirsî ye li ser wan hêzên girêdayî Tirkiyeyê. Loma metirsiya dagirkeriya artêşa Tirk cidî ye. Divê Kurd bi yekdengî û yekhelwestî li her derê li dijî hatina Tirkiyeyê rawestin. Çawa ku Kerkûkiyan ajandaya Tirkan têk birin, divê li Herêma Kurdistanê jî hatina Tirkan a ji bo wan herêman were têkbirin.”
Her wiha Kawêz Mela Perwîz behsa rewşa Herêma Kurdistanê kir ku rê xweş kiriye ji bo dagirkeriya Tirkiyeyê û got: “Ew rewşa ku li Herêma Kurdistanê heye rewşeke wisa afirandiye ku her hêzek li sînorê erdnîgariya xwe li gorî berjewendiyên xwe siyasetê dike û herêma xwe bi rê ve dibe. Başûrê Kurdistanê bi awayekî dabeş bûye ku rêveberiya hêzên siyasî diyar e, sînorên wan diyar in.”
Çavdêrê siyasî Kawêz Mela Perwîz behsa paşvebirina ajandaya Tirkiyeyê kir û got: “Li her du parêzgehên Kerkûk û Neynewayê bi rêya hilbijartinan ajandaya Tirkiyeyê paşve hat birin. Loma divê hêzên siyasî yên başûrê Kurdistanê di vê hilbijartina bê de, ji bo ku Tirkiye bi daxwaza xwe nekare zextê bixe ser bajarên Kurdistanê, çi dema ku êrişeke Tirkiyeyê li ser her bajar û bajarokekî başûrê Kurdistanê çêbe, divê em hemû bi hev re bi fikar bin. Eger êşek bigihîje Silêmaniyê, divê xelk li Duhokê bi fikar be; eger êşek bigihîje Amêdiyê û Tirkiye wê dagir bike, divê xelk li Celewla û Kerkûkê bi fikar be û wê wek pirsgirêka xwe bibîne. Bi vî awayî netewe çêdibe.”
Kawêz Mela Perwîz di dawiya axaftina xwe de wiha got: “Hêvîdar im di vê hilbijartina bê de li Parlamentoya Kurdistanê ev hevkêşe bê guhartin û dagirkeriya Tirkiyeyê li başûrê Kurdistanê paşve bê birin û ajandaya Tirkiyeyê li Herêma Kurdistanê li derekê bê sekinandin. Divê em bizanin ku ajanda û metirsiya dewletan li ser siberoja me Kurdan çi ye. Tirk eşkere dibêjin ku li tu dera cîhanê hebûna Kurdan û jiyana Kurdan qebûl nakin. Loma divê em hay ji van metirsîyan hebin. Divê em wek Kurd li berjewendiyên xwe binêrin û li gorî berjewendiyên xwe yên neteweyî bi dewletan re têkiliyan ava bikin. Divê Tirkiye di nav wê xelekê de be ku em her dem wê wek metirsî bibînin li ser hebûna xwe.”
