Karker Masîro (Halîl Erdem) di pêvajoiya xwerêveberiyê ya sala 2015’an de tevlî refên gerîla bû. Di sala 2019’an de jî li Mêrdînê şehîd bû. HPG’ê di daxuyaniya xwe ya bîranîna Karker Masîro de wiha gotibû, “Hevrêyê me Karker ku samîmiyeta di dilê wî de û evîna wî ya ji bo azadiyê di kenê wî de xuya dibû, bû milîtanekî şoreşger a rast. Her tim xwe perwerde kirinê esas girt û hemû erkên xwe bêyî kêmanî bi cih anî.”
Xwişka Şehîd Karker Masîro, Gûrbet Taş li ser jiyana birayê xwe û pêvajoya ku bi banga Rêber Apo despêkiriye axivî. Taş anî ziman ku ew aştiyê dixwazin, lê ew dev ji zimanê xwe jî bernadin.
‘ZILMA LI WELATÊ ME QEBÛL NEKIR’
Taş bi bîr xist ku ew jî gundê Selhê yê navçeya Mîdyat a Mêrdînê ne û wiha got, “Heval Karker kesekî pir egîd bû. Pir jêhatî bû. Di dema berxwedanê xwerêveberiyê de zilma li ser welatê me qebûl nekir û tevlî berxwedana xwerêveberiyê bû. Heta roja dawî li wê derê bi wan re ma. Piştre tevlî gerîlayan bû. Dema tevlî bû 30 salî bû. Di sala 2019’an de li gundê Stevrê şehîd bû. Em li Stenbolê bûn, ji me re gotin şehîd bûye. Heta em çûn cenazeyê wî anîn û veşartin.”
‘GELÊ ME GELEK BEDEL DAN’
Gûrbet Taş diyar kir ku ew li gel pêvajoya ku bi banga Rêber Apo hate despêkirin in û aştiyê dixwazin û wiha got: “Gelê me gelek bedel dan. Em aştiyê dixwazin, dixwazin bi zimanê xwe biaxivin û mafên xwe bi dest bixin. Pêşî dibêjin aştî û aştî, piştre weke ku aştiyê naxwazin tevdigerin. Em hemû aştiyê dixwazin. Em 20 sal in li vê derê ne, tîştek çêbûya em ê vegerîban. Em bêtehemûliya li hemberî zimanê Kurdî ya di komîsyonê de qebûl nakin. Me her tişt ji ber zimanê xwe kir. Çi dibe bila bibe em ê dev ji zimanê xwe bernedin.”
