5ˊemîn Festîvala Fîlman a Navneteweyî ya Rojava di roja xwe ya 6’emîn de berdewam dike. Di çarçoveya bernameyê de li Navenda Çand û Hunerê ya Mihemed Şêxo ya Qamişloyê bi sernavê “Di sêya şer û koçberiyê de sînema” semînerek hat dayîn.
Semîner ji aliyê Nivîskar Mecîd Arslan, Derhêner Xerîb Hemûd û sînemeger Ciwan Teter ve hat birêvebirin.
Di semînera ku gelek kesan şopand de çawaniya sînema û girêdana wê bi şer û penaberiyê re hat gotûbêjkirin. Axaftvanan, bal kişandin ser zehmetiyên ku sînemaya Rojavayê Kurdistanê û Sûriyeyê di navbera salên 2011ˊan û 2024ˊan de kişandin. Her wiha bandora şer a li ser sînemayê vegotin.
Hat diyarkirin ku sînemavanan şer û bandora wan bi çêkirina fîlm û nivîsandina sînaryoyan ragihandiye.
Di semînerê de hat destnîşankirin ku koçberî û rêyên koçberiyê wekî hêvî û mirinê raxistine pêşiya mirovan.
Axaftvanan, bi bîr xistin ku sînema wekî xebateke kolektîf hemû pêkanînên neyînî û dîroka fermî radixe ber çavan, dikare di demên pevçûnan de hem wekî propogandaya siyasî hem jî gel motîve bike. Ji bo vê yekê xebatên sînemaya Kurd bi taybet Komîna Fîlm a Rojava û berhemên li ser herêmên Efrîn û Şehbayê wekî mînak hatin nîşandan.
