Li eyaleta Schleswig-Holstein a Elmanyayê, ji rêveberên paye bilind ê Rêxistina Parastina Zagona Bingehîn (Verfassungsschutz) û namzetê Serokatiya Şaredariya Kîelê ya Partiya Keskan Samet Yilmaz, ji ber fikarên ewlehiyê ji wezîfeya xwe hate girtin.
Yilmaz ê 44 salî, serokatiya “daîreya nirxandina peywendiya derve” dimeşand. Qada wezîfeyê mijarên mîna komên rastgir ên tund ên Tirk û maseya PKK’ê digirt nava xwe.
Endamê Parlamentoya Federal a Dîe Lînke (Partiya Çep) Ferat Koçak têkildarî mijarê ji ANF’ê re axivî û îdîa weke “skandal” pênase kir. Koçak got, “Eger bi rastî jî têkiliya rêveberekî payebilind ê saziyeke îstixbaratê bi netewperestekî Tirk yan jî derdorên rastgir re hebe, ev eşkere skandalek e.”
BAWERIYA BI SAZIYÊN CIVAKÎ RE KÊM DIBE
Koçak bal kişand ser agahiyên ku dibêjin Samet Yilmaz piştgirî daye merasîma Roja Tirk a ku 8’ê Hezîranê ji aliyê Ocaxa Tirk a ATF Kîel a rastgirê tund ve hate lidarxistin û diyar kir ku vê yekê di baweriya civakê de pirsgirêkek cidî çêkiriye. Koçak got, “Ev rewş tenê baweriya bi saziyên civakî re kêm dike, di heman demê de nîşan dide ku torên rastgir di nava dewletê de çiqasê bi kok bûne.”
Ferat Koçak diyar kir ku divê bûyer bêkêmahî were lêkolînkirin û got, “Nabe ku teşkîlateke îstixbaratê ya ku saziyên Kurd dişopîne, bibe stargeha netewperestan. Divê bûyerên wiha bêkêmahî bên lêkolînkirin û hem encamên siyasî hem jî yên sazîbûnê derbixe holê.”
Koçak ragihand ku îdîayên navborî wê li Parlamentoya Federal bibe rojev û ev tişt got, “Nabe ku em van îdîayan ji nedîtî ve werin; weke ez û Dîe Lînke ji bo mijar li Meclîsa Federal bibe rojev û eşkere bibe, em ê israr bikin.”
