Piştî ku Washingtonê bi hinceta têkoşîna li dijî bazirganiya narkotîkê pênc keştiyên şer şand Karabîkê, Maduro got, “Em amade ne ku aştî, serwerî û yekparebûna xaka Venezuelayê biparêzin. Heta niha çi kirin bi ser neketin, ji niha û pê ve jî wê bi ser nekevin.”
Maduro anî ziman ku li hemberî van gavên ku weke ‘Hewldana guhertina rejîmê’ pênase kir, planeke parastinê ya taybet xistine dewrê û 4.5 milyono milîs xistine nava liv û tevgerê. Lê belê ev hejmar ji aliyê pisporan ve weke cihê nîqaşê tê dîtin.
Rêveberiya Caracasê li hemberî hêza deryayî ya Dewletên Yekbûyî yên Emerîkayê (DYE) hêza xwe ya deryayî û droneyên çavdêriyê li herêmê bi cih kir.
DYE Maduro weke serkêşê toreke narkotîkê ya navneweyî ya bi navê ‘Kartela Rojan’ sûcdar dike û ji bo girtina wî xelatek ji 50 milyon dolarî destnîşan kiriye.
Nûnerê Daîmî yê Venezuelayê yê li Neteweyên Yekbûyî Samuel Moncada jî nameyek ji Sekreterê Giştî yê Neteweyên Yekbûyî Antonio Guterres re şand û bang lê kir ku ji Washingtonê bixwaze ku dawî li çalakiyên dijminane bîne û hurmetê nîşanî serweriya Venezuelayê bide.
