Pêvajoya ‘Aştî û Civaka Demokratîk’ ya ku Rêber Apo di 27’ê Sibata 2025’an de da destpêkirin salek li pişt xwe hişt. Têkildarî vê pêvajoyê Şêniyên Wargeha Penaberan a Şehîd Rustem Cûdî (Mexmûr) ji ANF’ê re axivîn û banga yekîtiyê li gel û eşîrên Kurdan kirin.
‘DEWLETÊ GAVEKE BER BI ÇAV NEAVÊTIYE’
Fadîle Pîranî di destpêka axaftina xwe de diyar kir ku Rêber Apo di 27’ê Sibatê de bangawaziyek ji bo aştiyê kirin û got: “27 sal in Rêbertî di nava behrê de li ber xwe dide. Keda Rêbertî ya ku ji bo vê pêvajoyê da bi demjimêr, roj û salan nayê gotin. Wek gel me jî piştgiriya pêvajoya ku Rêbertî dayî destpêkirin kir. Her wiha rêxistinê jî gavên ber bi çav avêtin, weke hatina komên hevalan û di bin pêşengiya heval Besê de hevalan çekên xwe şewitandin. Rêbetî û rêxistinê tişta pêwîst pêk anîn, lê dewletê gaveke ber bi çav neavêtiye. Heta niha jî gelek kes di zindanan de ne û qewlê cezayên wan xilas bûye lê hîn jî girtî ne. Li rûxmê ku pêvajoyek hatiye destpêkirin jî lê hîn jî dewleta Tirk gefan li gelê Kurd dixwe, li cihên wek Rojava, Şengal û Mexmûr hîn jî gefan dixwe. Baweriya me bi dewletê nayê.”
Di dewama axaftina xwe de Fadîle Pîranî bal kişand li ser rapora meclîsê û wiha domand: “Raporek pêşkêşî meclîsê kirine, lê di rapora wan de tiştekî ku mirov bêje bi samîmî nêz bûyîne nîne. Li rûxmê hevdîtinan û pêvajoya ku hate destpêkirin jî şert û mercên Rêbetiya me neguhetine. Heta niha jî dewleta Tirkiye ji derveyî gefan û şerê taybet tiştekî din nekiriye. Mirov dikare bêje pêvajo ji aliyê dewletê ve hatiye sekinandin. Banga me ji bo giştî gelê Kurd ew e ku yekîtiya xwe çêbikin. Eger gelê Kurd yekîtiya xwe çêneke wê têk biçe. Divê dewleta Tirkiye ji bo vê pêvajoyê gavekê bavêje, em naxwazin xwîn bê rijandin. Tiştek bi şer çareser nabe, ji bo wê divê em li ser maseyê çareseriyekê pêk bînin. Em ê heta dawiyê piştgiriya pêvajoya ku Rêbetî me dayî destpêkirinin bikin. Em naxwazin pêvajo têk biçe.”
‘DI DÎROKA CÎHANÊ DE CARA YEKEM E KU ÇEK TÊN ŞEWITANDIN’
Hese Hilalî jî têkildarî pêvajoya 27’ê Sibatê axivî û got: “Wek tê zanîn Rêbertiya me li hemberî dewleta Tirkiye û cîhanê gavek avêtiye. Ev salek temam bû çi hat xwestin Rêbertiya me pêk anî. Rêbertî bangek kir ku PKK xwe fesix bike, ji ber bingehê ku Rêbertiya me danî qewîn bû ji bo wê jî PKK’ê xwe fesix kir. Her wiha Rêbertiya me bang kir ku heval ji Bakur xwe vekişand, bi wê ve girêdayî di bin pêşengiya heval Besê Hozat de çek hat şewitand. Ez dikarim vêya bêjim, di dîroka cîhanê de cara yekem e ku çek tê şewitandin. Her wiha gelek gavên din jî hatin avêtin, lê mixabin ji aliyê dewletê û hevalbendên wê ve ti gavek nehatine avêtin. Bila her kes bizanibin her gotinek a Rêbertî ji bo me ferman e. Ez bang li giştî gelê Kurd dikim ku xwe bikin yek, eger em nebin yek weke hemû şoreşên me yên berê çawan yek bi yek tinekirin wê me jî tine bikin. Her wiha em bang li hemû pêşeng û eşîrên Kurdan jî dikin ku xwe bi hêza xwe, bi rêxistin û Rêbertiya xwe re bikin yek.”
