Gerîlayên Azadiyê yên Kurdistanê Bawer Kobanê û Zeryan Rênas bi wesîleya salvegera 47’an a damezrandina PKK’ê ku ji bo gelê Kurd tê wateya “Cejna Berxwedanê” ji ANF’ê re axivîn.
“Navê min Bawer Kobanê ye, bi bandora hevrê Sara (Sakîne Cansiz) beşdarî nava partiyê bûm. Îro ji bo me rojeke pîroz e: Em salvegera 47’an a damezrandina PKK’ê pîroz dikin. Beriya her tiştî li damezrînerê PKK’ê li Rêber Apo pîroz dikin.
PKK naveke ku di dîrokê de nayê jibîrkirin. Gelekî hatiye qirkirin, kes nas nake, zimanê xwe li ber tinebûnê ye, zilm dîtiye û ji çanda xwe dûr ketiye, bi PKK’ê re veguherî gelekî tê naskirin. Êdî her kes dikare bibêje, ‘Ez Kurd im’.
Li ser bingeha vê pîvanê tevlî partiyê bûm. Piştî Banga Aştî û Civaka Demokratîk dibe ku PKK weke nav ji holê rabû be lê belê nayê jibîrkirin. ji ber ku PKK weke Partiya Karkerên Kurdistan bi şehîdên xwe û bi sosyalîzma xwe tê naskirin.
Em ji dostanî, têkoşîn û berxwedana PKK’ê bi bandor bûn. Di vê oxirê de gelek fedakarî hate kirin. Çiqasî fedakarî bê kirin jî têrê nake. Wan fedaiyan bi dirûşma ‘Bijî Serok Apo, bijî PKK’ bêteredût bi ser dijmin ve meşiyan.
PKK bi qasî ku partiyeke Rêbertî ye, her wiha partiyeke jinê ye. Dijmin dibêje, agir û barût çawa dikarin li gel hev bisekinin. PKK’ê kir ku di navbera jin û mêran de dostaniyeke rast ava bibe. Rêbertî dibêje ji bo mêrek bibe sosyalîstek divê bi jinê re dostaniyeke rasteqîn ava bike. Em jî li ser xeta Rêbertî û PKK’ê ji bo xwe hewl didin.
Armanca min ew e ku ji bo gelê xwe yê di bin qirkirinê de ye û ji bo azadiya Rêberê xwe têbikoşim. Ev yek berxwedan û têkoşînek e. Ez ê li ser xeta azadiya jinê û Manîfestoya Rêbertî bibim sosyalîstekî rasteqîn.”
‘PKK’Ê JI BO JINÊ JIYANEKE NÛ AFIRAND’
“Navê min Zeryan Rênas e. Beriya her tiştî 27’ê Mijdarê li Rêber Apo, şehîdên şoreşê, gelê me û her jinên ku di vê rêyê de têkoşînê dimeşînin pîroz dikim.
Dema ku em ji dayik bûn me çavên xwe bi PKK’ê vekir, ew bi wî rengî nas kir. Wateya PKK’ê ji bo me gelekî cuda ye. PKK’ê hebûna jinê derxiste holê, koletiya hezaran salan a li jinê tê ferzkirin ji holê rakir, kir ku têkoşîna wê bê dîtin û artêşa jinê ava kir.
Ji ber vê yekê dibe ku navê PKK’ê guherî be, lê belê di dilê me de PKK her tim heye û wê her tim hebe. Ji ber ku me di rêya PKK’ê de rastiya xwe nas kir, hebûna xwe nas kir û gihîşt vê astê. Me rêya rast dît û niha jî di vê rêyê de em têkoşîna xwe dimeşînin, em ê bimeşînin.
PKK’ê ji bo jinê jiyaneke nû afirand. Di nava sîstema civakê de hebûna jinê bi qasî ku tine be kêm bû, hevrêtiyeke rast tine bû û jin timî biçûk dihatin dîtin.
Di nava PKK’ê de hate nîşandan ku hevrêtî, bi taybetî hevrêtiya navbera jin û mêr divê çawa be, li ser kîjan bingehan bê avakirin.
Rêbertî bi taybetî destnîşan kir ku divê nirxekî gelekî mezin ji jinê re bê dayin ku jin karibe li her qadê bi rola xwe rabe.
Ez jî piştî ku tevlî bûm, ya bala min kişand ew bû ku herdu zayendan bi hev re karek dimeşand. Bi saya Rêbertî hebûna jinê gihîşt vê astê. PKK ava kir û 47 sal in bi vî rengî dewam dike.
Her jin a tevlî vê têkoşînê dibe rastiya xwe nas dike, hebûna xwe nas dike û dibe xwebûn. Zane ku kî ye, çi ye, çima tevlî bûye, çima têkoşînê dimeşîne.
Wateya PKK’ê ji bo gelê Kurd gelekî cuda ye. Ji ber ku gelê Kurd di pêvajoyeke qirkirinê de bû. Dema ku PKK rabû êdî her Kurdî zanî bû ku ew jî heye; ew jî dikare bi zimanê xwe biaxive, dikare zarokên xwe bi çanda xwe mezin bike û bi çanda xwe bijî.
Vê yekê hişyarbûnek afirand; gelê Kurd ji nû ve hişyar bû, kir ku bibêje ‘Ez Kurd im, ez hem e’.
Dixwazim ku her ciwanên Kurd, her dayik, her bav zarokên xwe bi vê çandê mezin bike.
Her wiha dixwazim ku her ciwanek xwe bide vê rêyê, hebûna xwe bêhtir zelal bike û rastiya xwe baştir nas bike.
Di nava vê sîstemê de ku Rêbertî ji nû ve ava kiriye di çarçoveya ‘Banga Aştî û Civaka Demokratîk’ de em ê xwe hîn bêhtir bi pêş ve bibin, têkoşîna xwe xurt bikin û mezin bikin.”
