Girtiyên Partiya Sosyalîst a Bindestan (ESP) û Federasyona Komeleyên Ciwanên Sosyalîst (SGDF) li dijî tecrîda li Girtîgeha Ewlekariya Bilind (YGC) rû bi rû dimînin dest bi greva birçîbûnê ya bêdem û dorveger kirin.
Hat diyarkirin ku endamên ESP û SGDF’ê yên ji 24’ê Çileyê ve girtî ne ji Girtîgeha Sîlîvriyê sewqî girtîgehên cuda hatin kirin, di dema sewqê de muameleya xerab li wan hat kirin û li girtîgehên Ewlekariya Bilind ên ku ji bo gelek girtiyan weke “tîpa bîrê” hatin binavkirin, hatin bicihkirin.
Li gorî agahiyên ku ji aliyê parêzerên girtiyan ve hatine ragihandin, Adnan Ozcan û Ahmet Bilal Bay ên ku li Girtîgeha Ewlekariya Bilind a Hejmara 2 a Sîncanê têne ragirtin, ji îro pê ve dest bi greva birçîbûnê ya bêdem kirine. Mazlûm Ortaç û Onur Yoldaş Mete yên ku li Girtîgeha Ewlekariya Bilind a Karatepe ya Corluyê têne ragirtin jî, dest bi greva birçîbûnê ya bêdem û dorveger kirine. Parêzeran anîn ziman ku ji 34 muwekîlên wan 12 kes bi “sewqên sirgûnê” şandin girtîgehên Ewlekariya Bilind û li wir tên girtin. Li van girtîgehên weke “tîpa bîrê” tên binavkirin, di hucreyên yekkesî tên ragirtin.
