Rêxistina Mafên Mirovan a Hana raporek li ser girtin û revandina welatiyên Kurd ji aliyê rejîma Îranê ve weşand.
Li gorî raporê, du welatiyên bi navê Diyako Bayizîdî û Mustafa Coşkar yên ji Mehabadê ji aliyê hêzên îstîxbarata Artêşa Pasdarên ve li bajêr hatine girtin û birine cihekî nenas.
Her wisa di raporê de hate eşkerekirin ku duh Îlya Lutfî Tormakçî ya 17 salî ji Banayê duh ji aliyê hêzên maskedar yên rejîma Îranê ve hatiye revandin.
Her wisa hate gotin ku di 19’yê Cotmeha îsal, Ehed Meyhenxahî yê 19 salî ji navçeya Şîno ya ser bi parêzgeha Ûrmiyeyê hatiye girtin û ji bo ku cezayê xwe yê pênc salan ku lê hatiye birîn bikşîne, ew birina girtîgeha Nexede.
Ehed Meyhenxahî di 24’ê Çileya 2026’an de bêyî fermana dozger ji aliyê dezgeha îstîxbarata Îranê (Îtlaet) ve hatiye girtin û piştî nêzîkî mehekê bi kefalet hatiye berdan. Piştre ji aliyê Dadgeha Şoreşê ya Şîno ve bi tohmeta “alîkariya muxalefetek dijî-Îranê” cezayê girtîgehê lê hatiye birîn.
Her wisa di raporê de hate eşkerekirin ku di 16’yê Cotmeha îsal de, hêzên îstîxbaratê yên rejîma Îranê bêyî fermanek nivîskî û biryara dozger bi ser mala Aram Emînî li Seqizê de girtin û ew revandin. Piştî derbasbûna pênc rojan, hîn jî tu agahî li ser çarenûsa wî tune ye.
