Hevserokatiya Konseya Rêveber a KCK’ê ji bo rojnamevan Huseyîn Aykol ê ku 14’ê Cotmehê xwîn çû ser mejiyê wî û îro jiyana xwe ji dest da, peyama sersaxiyê weşand.
Di peyamê de ev tişt hatin diyarkirin:
“Ji kedkarên Çapemeniya Azad rojnamevan-nivîskar Huseyîn Aykol li nexweşxaneya ku tedawî lê didît, jiyana xwe ji dest da. Di sala nû de agahiyeke wiha, em pir xemgîn kirine. Wefata mirovekî ku temenê xwe daye têkoşîna xwişk-biratiya gelan, demokrasî û sosyalîzmê, bê guman sedemê xemgîniyeke mezin e. Di serî de malbata wî û xizmên wî, em ji camîaya çapemeniyê, gelê Kurd û tevahî gelên Tirkiyeyê re sersaxiyê dixwazin.
Ji bo pêşketina çapemeniya Kurdî, kedeke mezin a Huseyîn Aykol heye. Bûye pênûseke kedkar û xurt a kevneşopiya çapemeniya azad. Li dijî zehmetiyên mezin rabû, li dijî zext û êrîşan dest ji berxwedanê neberda û ji avabûna kevneşopiya Çapemeniya Azad û heya roja me ya îro bi roleke mezin rabûye, bûye pêşeng. Dîsa Huseyîn Aykol ji bo ku raya giştî ya cîhanê û Tirkiyeyê êrîş û bêmafiyên li ser gelê Kurd bibîne, kedek girîng daye. Bi têkoşîn û keda xwe hem di têkoşîna demokrasiyê ya Tirkiyeyê hem jî di têkoşîna azadiyê ya gelê Kurd de, bûye xwedî cihekî girîng. Rêber Apo jî diyar kir ku ji ber giranbûna rewşa tenduristiya Huseyîn Aykol ê hêja, pir xemgîn bûye û di her hevdîtinê de tenduristiya wî pîrs kiriye û xwesteka xwe aniye ziman ku tenduristiya wî baş bibe û wî bibîne.
Em car din xemgîniya xwe diyar dikin, ji malbat, xizmên wî, dostên wî, camîaya çapemeniyê û gelên xwe re sersaxiyê dixwazin. Em bawer dikin ku gelên me û Çapemeniya Azad wê bi rengekî xurt xwedî li bîranîna Huseyîn Aykol derbikevin.”
