Dîmenên xelatkirinê li ser malpera Wezareta Parastinê hatine parvekirin. Tê de diyar dibe ku firqeya 60 a hêzên hikumeta veguhêz a Sûriyeyê kesek bi navê Ebû Seyf El Îslam El Hedîdî El Haşimî yê ku bi navê “Ebû Ezab Ebû El Zihûr” tê naskirin, xelat kir. Heman kes, beriya çend hefteyan di dîmenekê de Ebû Ezab bi navê “hêzên êlan” dagirkirina gundê El Metûne yê bakurê Siwêdayê radigihîne.
Di dîmena ku Ebû Ezab 19`ê Tîrmehê belav kiriye de, hêzên êlan gund kontrol kiriye û Ebû Ezab xwe wek berdevkê fermê yê êlan dide nasandin û soz dide ku êrişan bidomîne. Di wê êrişê de, Ebû Ezab bi xwe çavdêriya koçberkirina şêniyan, talankirin û şewitandina malên wan li gundên El Lewa kiriye ku ji aliyê rêxistinên hiqûqî yên herêmî ve hatin belgekirin.
Ji destpêka bûyerên li Siwêdayê ve, hikumeta veguhêz hewl dide xwe ji berpirsyariya êrişan bide alî û ew êriş bi “nakokiyeke xwecih di navbera durzi û êlan” de diwesifîne û ew navbeynkariyê di navbera wan de dike. Lê bi xelatkirina Ebû Ezab ji aliyê Wezareta Parastinê ve, berovajî wê îdiayê îsbat dike. Aşkera dike ku ew hêz bi fermana rasterast a artêşê û “hêzên ewlehiyê” tev digere.
Piştî daxuyaniyên serokê hikumeta veguhêz Ehmed El Şeri li New Yorkê ku li pêşiya Komeleya Giştî ya NY`yê soz da hesabê ji berpirsên komkujiyên Siwêdayê bipirse, Ebû Ezab hate xelatkirin. Lê ev xelatkirin, wisa diyar dike ku hikumet, ne tenê sûcan vedişêre lê belê sûcdaran xelat dike. Ev jî, nakokiya di navbera gotara derve û kiryarên li hundir de nîşan dide.
