Tevgera Jinên Azad (TJA) bi daxwaza azadiya fîzîkî ya Rêber Apo ji Amedê ber bi Enqereyê ve bi dirûşma “Em bi hêvî ber bi azadiyê ve dimeşin” meş dabû destpêkirin û meş di roja 3’yan de didome. Gelek siyasetmedaran bi peyamên xwe piştgirî dan meşa TJA’yê. Hevseroka Komîteya Têkiliyên Derve ya Rêveberiya Xweseriya Demokratîk a Bakur û Rojhilatê Sûriyeyê Îlham Ehmed jî peyameke bidîmen şand û piştgirî da.
Peyama Îlham Ehmedê wiha ye:
“Silav ji hemû jinên bedew û hêja yên li Kurdistan û Tirkiyeyê re. Karê ku hûn dikin, meşa ku hûn dikin, karekî pir hêja ye; ji bo pêşeroja jinan pir girîng e. Em bi dil û can piştgiriyê didin we. Rola jinan, serokatiya wan û her gavek ku ew diavêjin, rêxistinek ji bo aştiyê li seranserê Tirkiyeyê, ji bo çareserkirina pirsgirêka Kurd û bê guman ji bo demokrasiyê û demokratîkbûna Tirkiyeyê ye. Ev gav gavên ku ji bo çareseriya bingehîn û dawî ya pirsgirêkên siyasî yên Tirkiyeyê têne avêtin in. Ji ber vê yekê, em dibêjin; em hemû dengê xwe li dengê we zêde dikin, em di her gavê de li kêleka we dimeşin û bi we re ne. Bi van hestan, em ji we re serkeftinê dixwazin. Jin, jiyan, azadî. Azadî ji bo girtiyên siyasî. Aştî ji bo Tirkiyeyê û demokrasî ji bo çareseriya pirsgirêka Kurd. Bi hezkirin û rêzgirtinê, ez ji we hemûyan re serkeftinê dixwazim.”
