Meclîsa Tenduristiya Karkeran û Ewlehiya Kar (ÎSÎG) Rapora Cînayetên Kar a Gulana 2026’an weşand. Li gorî raporê, di meha Gulanê de herî kêm 212 karkeran jiyana xwe ji dest dane.
Di nava sedema mirina karkeran de qezayên trafîkê û serwîsê li gel rêjeyeke weke ji sedî 24’an di rêza yekemîn de cih girt. Mirinên ji ber krîza dil û xwînariya mejîyî weke ji sedî 14 û mirinên ji ber pelçiqîn û tepînkê jî weke ji sedî 16 hatin tomarkirin.
Di raporê de hate diyarkirin ku li gorî beşkaran mirin herî zêde di sektorên weke çandinî, daristanî, înşaet, barkêşî û xizmetên şaredariyê de pêk hatine. Hate îfadekirin ku di sektorên çandinî û daristaniyê de 48, di yên înşaet û çêkirina rêyan de 38, di ya barkêşiyê de 33, di yên şaredarî û giştî de 16 û di yên bazirganî û perwerdeyê de jî 11 karkeran jiyana xwe ji dest dane.
Hate destnîşankirin ku karkerên ku jiyana xwe ji dest dane 13 jê jin in û 199 jî zilam in. Her wiha hate îfadekirin ku di nava kesên jiyana xwe ji dest dane de 7 karkerên zarok 16 karkerên penaber jî hene.
Meclîsa ÎSÎG’ê bi boneya 12’ê Hezîranê Roja Têkoşîna Li Dijî Karkeriya Zarokan a Cîhanî ‘’Rapora Cînayetên Karkerên Zarok’’ amade kir û li gel raya giştî parve kir.
Li gorî raporê, di navbera salên 2013- 2026’an de herî kêm 862 zarok dema li ser kar jiyana xwe ji dest dane. Di nava sedemên mirina karkerên zarok de qezayên trafîk û serwîsê li gel rêjeyeke weke ji sed, 27’an di rêza yekemîn de cih girt. Her wiha ji sedî 16 xeniqîn û jehrîbûn û ji sedî 14 jî ji ber pelçiqîn û tepînkan pêk hatine.
Her wiha raporê de hate diyarkirin ku ji zarokên ku ji ber kar jiyana xwe ji dest dane herî kêm 100 ji wan penaber bûne.
