Bi sedan şêniyên kantona Firatê, endamên saziyên Rêveberiya Xweser, rêxistinên jinan û partiyên siyasî sersaxî ji malbata gerîlayê HPG`ê Sabrî Kobanê (Diyar Şêx Beha) re xwest ku 16`ê Hezîrana 2023`yan şehîd bûbû.
Girseya gel bi dirûşmên “Şehîd namirin” û “Bi can bi xwîn em bi te re ne ey şehîd” berê xwe da konê sersaxiyê.
Li bin kon deqeyekê rêz ji bo giyanên cangoriyên azadiyê hat girtin, dûre endamê Meclisa Malbatên Şehîdan a Kantona Firatê Elî Hoşan sersaxî ji malbata şehîd Sabrî Kobanê re xwest û diyar kir ku ew ê xewn û xeyalên şehîdan pêk bînin.
Elî Hoşan anî ziman ku şehîdan ji bo parastina welat û gelê xwe têkoşîneke bêhempa da meşandin û wiha got: “Şehîdên me nirxên me yên pîroz in. Dîroka ku bi hezaran salan hatiye windakirin bi saya Rêber Apo ev dîrok ji cîhanê re aşkera bû û mafê hemû kesan parast.”
Hoşan soz da ku ew ê şopdarên şehîdên azadiyê bin û ew ê mîrasa şehîdan xwe biparêzin û xewn û xeyalên wan pêk bînin.
Hevseroka Meclisa Malbatên Şehîdan a kantona Firatê Sara Xelîl diyar kir gel û şervanan di şerê Bendava Tişrîn û Qereqozaqê de berxwedana bêhempa li hemberî dijmin da meşandin û ew têk birin û got: “Berxwedana şervanên me berxwedaneke herî pîroz e, divê hem piştgiriya wan bikin ji bo ku em planên dijmin têk bibin. Divê em kîna xwe li hember dijmin xurttir bikin, ji ber ku em hêza xwe ji giyanên şehîdên xwe digirin. Em soz didin şehîdên xwe ku em ê xewn û xeyalên wan heta azadiyê pêk bînin.”
Merasîma sersaxiyê bi dirûşmên “Şehîd namirin” bi dawî bû.
