Komîsyona Kedê ya Partiya Demokrasî û Wekheviyê ya Gelan (DEM Partî) tekildarî bernameya 1’ê Gulanê Cejna Karker û Kedkaran a Cîhanê bi diruşmeya, “Ji bo nan, aştî û edaletê bi hev re ber bi 1’ê Gulanê ve” li navenda Giştî ya DEM Partiyê daxuyanî da. Hevberdevkên Komîsyona Kedê ya DEM Partiyê Mehmet Bozgeyîk û Sevtap Akdagê daxuyanî dan.
Sevtap Akdag anî ziman ku ew ê îsal ji bo nan, edalet û aştiyê li qadan bin û got, “Her ku diçe şerê emperyalîstan kûr dibe û kriz û xizanî zêde dibe. Li rex vê yekê berxwedana gelan jî mezin dibe. Polîtikayên şer xizaniyê mezin dike û kedê bêqîmet dike. Her wiha hêviya aştiyê jî qels dike. Li cihê ku şer hebe paşeroja gelan jî tarî dibe. Ji bo wê daxwaza aştiyê parastina kedê ye. Ji bo wê em ê îsal bi daxwaza aştiyê jî li qadan bin. Sînorê birçîbûnê ji 30 hezar TL’yî bihurî ye. Lê mûçeyê kêmtirîn welatiyan ber bi xizaniyê ve dibe û hemû kedkar di xizaniyê de wekhev dike.
Em ê têkoşîna xwe ya li dijî kesên çav berdanê nanê me mezintir bikin. Daxwaza me ya nan jî wê li qadan be. Her wiha keda jinan nedîtî ve tê dîtin. Li dijî vê jî em ê bi hemû daxwazên azadiya jinan li qadan bin. Em ê ji bo daxwazên edalet û aştiyê yên gelê Kurd jî li qadan bin. Em ê li hemû bajaran li qadan bin. Werin em bi hev re daxwaza aştî û azadiyê bilindtir bikin.”
Mehmet Bozgeyîk jî diyar kir ku wê di 1’ê Gulanê de bi karkeran re werin cem hev û wiha pê de çû: “Em ê bi hemû daxwazên xwe li qadan bin. Dema 1’ê Gulanê tê gotin Qada Taksîmê tê bîra mirov. Lê mixabin ew hişmendiya qedexekar 23 sal in qedexeya Taksîmê didomîne. Em bang li desthilatdariyê dikin ku qada Taksîmê ji karkeran re vekin. Ez careke din hemû gelên me ji bo bilindkirina daxwazan vedixwînim qadan.”
