Di bangawaziyê de hat diyarkirin ku meş wê roja Şemiyê, 14’ê Sibatê, saet di 10.00’an de li Boulevard de Lyon a bajarê Strasbourgê dest pê bike. Her wiha hat bibîrxistin ku ev dîrok salvegera komploya navnetewî ye ku armanca wê teslîmgirtina vîna gelê Kurd e.
Di daxuyaniyê de hat destnîşankirin ku tecrîda li Îmraliyê ya li ser Rêber Apo ne tenê li dijî kesekî ye, paşeroj û hêviyên gelekî dike hedef. Hat gotin ku ev pergala tarî ya 25 sal in berdewam dike, nekaribûye gelê Kurd bêdeng bike.
Di daxuyaniyê de bal hat kişandin ser geşedanên li Rojava jî. Hat diyarkirin ku li herêmê êrîşên DAIŞ’ê ji nû ve tên zindîkirin û gefên leşkerî yên Tirkiyeyê berdewam dikin; bi taybetî berxwedana bi pêşengiya jin û ciwanan tê hedefgirtin. Hat destnîşankirin ku ev pêvajo berdewamiya Komploya 15’ê Sibatê ye.
Hat ragihandin ku di meşa 14’ê Sibatê de daxwazên mîna dawîkirina tecrîdê, misogerkirina azadiya fîzîkî ya Rêber Apo û xurtkirina piştevaniya li dijî êrîşên li ser herêmên Kurdistanê, bi taybetî li ser Rojava, wê derkevin pêş.
