Rojnameya Newaya Jin hejmara xwe ya taybet a 250’emîn ji komkujiyên Parîs û Silopiyayê re veqetand. Di manşetê de jî cih da gotina “Têkoşîna me dijwar e, balkêş e û yekkirî ye” ku gotina yek ji damezrînerên PKK’ê Sakîne Cansiz (Sara) ye.
Komkujiyên Parîsê yên Çileya 2013 û Kanûna 2022’an û komkujiya li navçeya Silopiya ya Şirnexê ya Çileya 2016’an di hejmara taybet de bi berfirehî hate nirxandin. Di dosyayê de li gel têkoşînên hiqûqî û civakî yên gel û jinên Kurd ên li hemberî komkujiyan, her wiha jiyana têkoşînê ya kesên hatin qetilkirin, azadiya jinê û mijara xweparastinê hate vegotin.
Di 9’ê Çileya 2013’an de yek ji damezrînerên PKK’ê Sakîne Cansiz, Nûnera Parîsê ya KNK’ê Fîdan Dogan û endama Tevgera Ciwanan Leyla Şaylemez li Parîsê hatibûn qetilkirin.
Di 4’ê Çileya 2016’an de endama Meclîsa Partiyê ya DBP’ê Sêvê Demîr, Hevseroka Meclîsa Gel Pakîze Nayir û aktîvîsta KJA’yê Fatma Ûyar li taxa Karşiyaka ya Silpoiyayê hatibûn qetilkirin.
Di 23’ê Kanûna 2022’an de Evîn Goyî (Emîne Kara), Abdurrahman Kizil û hunermend Mîr Perwer di êrişa ku weke “Komkujiya Parîsê ya Duyemîn” hate binavkirin de jiyana xwe ji dest dabûn.
Di hejmara taybet de têkoşîna piştî van komkujiyan, pirsgirêkên di pêvajoyên hiqûqî de û encamên berxwedana jinan ji aliyê nivîskarên cuda ve hatin nirxandin.
Dosya û nivîsên di rojnameyê de hatin weşandin bi vî rengî ne:
Denîz Nûrhak di gotara xwe de ya bi sernavê “Komkujiyên Parîsê yên bi têkoşînê hatin ronîkirin lê bi hiqûqê hatin tarîkirin” qala aliyên têkoşîna hiqûqî û civakî ya piştî herdu komkujiyên Parîsê kir.
Berfîn Guneş bi sernavê “Komkujiyên Parîsê: Şîn, Berxwedan û Hiş” gotarek nivîsî û berxwedana civakî ya jinan nirxand û destnîşan kir ku bîranîn ji bo jinan têkoşîneke polîtîk e.
Haskar Kirmizigul jî di nivîsa xwe de ya bi sernavê “Rêya ku gotinekê vekir” giranî da ser têkiliya navbera hiş û berxwedanê; aliyê gerdûnî yê berxwedana Sakîne Cansiz nirxand.
Di hejmara taybet de her wiha nivîsên Fermandara YJA Starê û Endama Meclîsê ya PAJK’ê Berfîn Nûrhaq (Hanim Xanê Demîr) jî hatin berhevkirin û weşandin ku Berfîn Nûrhaq di 13’ê Kanûna 2021’ê de li Garê şehîd bû.
Nirxandinên ku Rêber Apo di sala 1994’an de li ser azadiya jinê kir, bi sernavê “Ji bo şoreşa jinê, exlaqê şoreşgerî pêwîstî ye” li rûpela forûmê hatin weşandin.
Di rojnameyê de li ser mijarên xeta berxwedanê ya jinên Kurd, pêşengiya wan li pêvajoya xwerêveberiyê, têkoşîna jina a li Rojava, Rojhilat û Ewropayê, portreyên Sakîne Cansiz, Fîdan Dogan, Leyla Şaylemez, Sêvê Demîr, Pakîze Nayir û Fatma Ûyar û gelek hevpeyvîn û analîz hatin weşandin.
Hejmara taybet a 250’emîn a Newaya Jin li ser navnîşana newayajin.net dikare bê peydakirin.
