Hevpeymana Hêzên Siyasî ya Kurdistana Îranê piştî lidarxistina civînekê di 16’ê Gulana 2026’an de, derbarê rewşa tevgera rizgarîxwaziya Kurdistanê û erkên dîrokî yên hevpeymaniyê de, daxuyaniyek belav kir.
Naveroka daxuyaniyê bi vî awayî ye:
“Gelê têkoşer ê Kurdistanê, raya giştî û azadîxwazan!
Hevpeymana Hêzên Siyasî ya Kurdistana Îranê, roja 16’ê Gulana 2026’an civînek ji bo nirxandina rewşa niha ya tevgera rizgarîxwaziya Kurdistanê û erkên dîrokî yên vê hevpeymaniyê di vê qonaxê de lidar xist.
Di vê civînê de, piştî nirxandin û gotûbêjkirina bûyerên dawî, encamên şerê Amerîka û Îsraîlê li gel Îranê û hewldanên paşê yên ji bo agirbest û îmzekirina lihevhatina di navbera Amerîka û Îranê de, asoya paşeroja siyasî ya Îranê hate nirxandin û ev encam hat girtin; ew komelên civakî yên gelê Kurdistan û Îranê ne ku bi berdewamiya xebat û mafxwaziya xwe dê dawî li rejîma Komara Îslamî bînin. Di rastiyê de, tirsa herî mezin a rejîmê, xebata mafxwaziya komelên gel a li navxweyî ya Îranê ye, ku heta niha di vê oxirê de rûbirûyî robarekî xwînî bûne.
Hevpeymana Hêzên Siyasî ya Kurdistana Îranê di wê baweriyê de ye ku doza rewa ya Kurd û xebata rizgarîxwazî ya vê neteweyê, xwedî demboriyek dûr û dirêj û dewlemende. Ne dibin bandora tu cure şer û pêşbaziyên herêmî deye. Li gorî nêrîna me, berevajî têgihîştina ku di asta navneteweyî de heye, Komara Îslamî sîstemeke xwedî ezmûneke wiha ye ku ev cure lihevhatin û heta peyman bixwe jî, cewher û naveroka rejîmê naguherin. Ji ber vê yekê, guhertina rastîn tenê di rêya piştgirtina bi hêza navxweyî ya gel, yekgirtina hêzên Kurdistanî û demokratîkxwazên Îranê û berdewamiya tevgerên sivîlî re pêkan dibe. Di her guhertineke li paşerojê de, pêşî her tiştî pişta xwe bi îrade, xebat û berxwedana neteweyî ya Kurd û neteweyên din ên Îranê ve girê dide.
Hevpeymana me diwê baweriyê de ye; ligel ku lawazbûna Komara Îslamî ya di encama nakokî û şer de dikare bibe alîkarê tevgera mafxwaziya neteweyên Îranê, lê belê em pişta xwe bi îrade û enerjiya xebatkariya xwe bixwe ve girê didin û çarenûsa xebata xwe bi lihevkirin û şerê welat û aliyên derve yên li gel Komara Îslamî ve girênadin. Tevî Komara Îslamî ya Îranê piştî vî şerî dest bi zêdekirina pêlên girtin û darvekirina çalakvanên siyasî û sivîlî kiriye, zextan li ser civakê zêde dike û bi êrîşên terorîstî yên berdewam ên li ser partiyên Kurdistanî yên li Başûrê Kurdistanê hewla lawazkirina vê tevgerî dide, lê belê tevgera Kurd bi van çewisandin û zextan çok danayne.
Hevpeymana Hêzên Siyasî ya Kurdistana Îranê, di vê qonaxê de weke rêzgirtinek ji bo daxwaza gel û hewcedariya tevgera Kurdistanê, tekezî li ser pêşxistina karê hevpar, berdewamî û bihêzkirina yekgirtina navxweyî, bilindkirina asta çalakiyên medyayî û beşdariya çalak û bawerîbexş di pêvajoya biryardana hevpar de dike. Herwiha hewldanên wê yên ji bo nêzîkbûna herî zêde di oxira gotareke hevpar, karê meydanî yê hevpar û rûbirûbûna her çewtiyeke bêhêvîker dê berdewam bin. Her wiha heya bi destxistina mafên rewa yên tevgera rizgarîxwaziya Kurdistanê tekezî li ser berdewamiya xebatê dike.’’
