Hevserokatiya Konseya Rêveber a KCK’ê got, “Di 15’ê Mijdara 1937’an de yek ji Rêberê berxwedana Dersimê Seyîd Riza û hevrêyên wî hatin darvekirin. Em di salvegera darvekirinê de Seyîd Riza û hevrêyên wî careke din bi hurmetî bibîr tînin. Di şexsê wan de em tevahî şehîdên şoreş û demokrasiyê bi hurmetî û minetdarî bibîr tînin û li ber bîranîna wan bejna xwe ditewînin. Em komkujiya Dersimê ku yek ji komkujiyên herî hovane ye di dîroka mirovahiyê de ye, şermezar dikin û kesên jiyana xwe ji dest dane bi hurmetî bibîr tînin.
Di daxuyaniya KCK’ê de ev tişt hatin gotin:
“Li Dersimê komkojiyek mezin hatiye pêk anîn û êşên mezin bi gelê Kurd dane jiyandin. Dîrokeke ku ji her alî ve bi êşe û bi îbret e. Çem bi xwînê herikîn, zarok di zikên dayikên xwe de hatin kuştin. Ev komkujî di bîra mirovan de wisa xwe parastiye. Komkujiya Dersimê rastiya dewletê ya înkar û qirkirin bi rengekî zelal eşkere dike. Her wiha asta dijminatiya wê ya li dijî gelê Kurd radixe ber çavan. Heta bi komkujiya Dersimê re rûbirûbûnek çênebe, ne lekeya reş a li ser mirovahiyê dê ji holê rabe û ne jî Tirkiye dikare guhertinek rastî pêk bîne.
Rêberê berxwedana Dersimê Seyît Riza, ji bo pirsgirêkê bi rêya aştiyane û diyalogê çareser bike, hewl dide bi rayedarên dewletê re hevdîtinê pêk bîne. Ji ber vê dikeve rê, lê di rê de tê girtin û darvekirin. Bi vî rengî darvekirina Seyîd Riza û hevrêyên wî amadekarî û armanca dewletê radixe berçavan. Dewletê biryara komkujiyê dabû û ji bo vê komkujiyê her cure komplo ji bo xwe weke armanc xistibû dewrê. Darvekirina Seyîd Riza û hevrêyên wî di encama komployekê de pêk hatiye.
Seyîd Riza li hemberî komkujiyan serî netewandiye û ji bo gelê Kurd mîrateyek xurt a berxwedanê li pey xwe hiştiye. Komkujiya Dersimê çiqas bi êş û mezin bûye, berxwedan û serhildana Seyîd Riza jî ewqas mezin û xurt bûye. Li Kurdistanê berxwedana gelê Kurd a li dijî komkujî û qirkirinan, bi saya serhildan û sekna Seyîd Riza û Şêx Seyîdan pêk hatine. PKK’ê ku bi têkoşîna 52 salan a bênavber zîhniyeta înkar û qirker têk bir û hebûna gelê Kurd îsbat kir, bêguman xwe dispêre vê mîrateya dîrokî.
Em careke din Seyîd Riza û hevrêyên wî bibîr tînin û li ber bîranîna wan bi hurmetî bejna xwe ditewînin. Bêguman berdêl û êşên ku gelê Kurd jiyan e, bê encam nînin. Bi serketina pêvajoya ‘Aştî û Civaka Demokratîk’ re ku Rêber Apo pêş xistiye, dê pirsgirêka Kurd çareser bibe û Tirkiye demokratîk bibe. Ewqas êş û berdêl wê di dîrokê de cih bigire. Em ê jî berpirsyariya xwe ya li hemberî dîrokê bi cih bînin.”
