Di 6’ê Çileya 2026’an de komên El-Emşat, El-Hemzat, Sultan Murad û Nureddîn Zengî yên girêdayî Hikumeta Demkî ku piştgiriya xwe ji dewleta Tirk digirin, êrîşên berfireh li ser Taxên Şêxmeqsûd, Eşrefiyê û Benî Zeyd didin meşandin.
Di encama wan êrîşan de gelek sivîl şehîd bûn û birîndar bûn. Li hember wan êrîşan gel û Hêzên Ewlekariya Hudurin li ber xwe didin û xwe diparêzin.
Xelkê Efrînê yên ku ji Şehba koçberî bajarê Hesekê bûne berxwedana gel silav kirin û êrîşên komên çete yên li ser gel û taxên Şêxmeqsûd, Eşrefiyê û Benî Zeyd şermezar kirin.
Di despêkê de Nemet Elîko axivî û diyar kir ku berxwedana gel pîroz e û ew ê her tim li pişta gelê xwe bin û wiha got, “Ev ne cara yekê ye ku êrîşên bi vî awayî li ser her du taxan tên kirin. Hikumeta Demkî ev cara sêyemîn e êrîşên xwe li ser taxê de tîne. Lê gelê ku li wan taxan jiyan dike, gelekî berxwedêr e û ji bo maf û hebûna xwe hertim têkoşîn kiriye. Ji bo wê ew gel ji bo berxwedaniyê hertim amade ye û ji bo aştiyê jî hertim amade ye. Em gelê Efrînê heta dawî piştgiriya gelê xwe û hêzên xwe yên Ewlekariya Hundurîn ên her du taxan dikin. Em di wê baweriyê de ne ku wê serkeftinên mezin derkevin û hemû deverên dagirkirî bên rizgarkirin.’’
Welatiyê bi navê Bîlal Bîlal jî axivî û wiha got, ‘’Em gelê Efrînê ku li bajarê Hesekê li ber xwe didin, ji gelê xwe yê li Şêxmeqsûd û Eşrefiyê re dibêjin ku em her tim li kêleka we ne. Berxwedanî û sekna gelê Şêxmeqsûd û Eşrefiyê serbilindî ye. Weke gelê Kurd em ê di her kêliyê de berxwedaniya xwe berdewam bikin. Heta ku dilopek xwîn di canê me de heye em ê hertim li pişta gel û zarokê xwe bin. Eger were xwestin em ê berê xwe bidin Şêxmeqsûd û Eşrefiyê û li kêleka gel li ber xwe bidin.’’
Di dawiyê de Fatmê Xilo jî axivî û destnîşan kir ku tevî ku êrîşên giran li ser taxê tên kirin jî, Hêzên Ewlekariya Hundurîn li hember wan êrîşan li ber xwe dide û nahêle komên çeteyên bikevin taxê. Fatmê Xilo got, “Gelê me yê li Şêxmeqsûd û Eşrefiyê xwedî îradeyeke xurt e, taxa xwe bernade. Di sala 2013’an de û gelek caran piştî wê êrîş hatin ser gelê me yê li taxên Şêxmeqsûd û Eşrefiyê, lê îradeya wan hertim xurt bû. Em wek jinên ku niha li vir li ber xwe didin hêz û morale, ji gelê xwe yê li taxa Şêxmeqsûd û Eşrefiyê digirin. Em wekî gel li vê derê hertim li qadan bin û piştgiriya xwe ji bo gelê xwe bikin.’’
