Konfederasyona Navendên Civaka Demokratîk a Kurd li Elmanyayê (KON-MED) êrîşên li dijî lîstikvanê futbolê yê Kurd Deniz Undav di maça Fenerbahçe-Stuttgartê ya Lîga Ewropayê ya UEFA’yê de şermezar kir.
KON-MED di daxuyaniya nivîskî de diyar kir ku Denîz Undav berê gotibû, “Ez bi eslê xwe Kurd im, ne Tirk im,” di maça li Stenbolê de ji aliyê lîstikvan û alîgiran ve rastî êrîşê hat. Di daxuyaniyê de hat gotin ku pêşkêşvanê TRT’ê qet navê Undav bi kar neanî û ev “mînakek eşkere ya nijadperestiyê” ye.
Di daxuyaniya KON-MED’ê ev tişt hatin gotin: “Denîz Undav ê ku ji aliyê lîstikvanên fûtbolê yên Tirk ve hatiye hedefgirtin û rastî heqaretên zayendî û çêrên ji aliyê alîgiran ve hatiye, ne bi tenê ye. Ji gelek deverên cîhanê bi taybetî ji Kurdistan û Tirkiyeyê piştgiriya ji bo Undav mezin bû. Wek KON-MED’ê, em hevgirtina xwe bi Denîz Undav re radigihînin.”
Di daxuyaniyê de hate destnîşankirin ku polîtîkayên li Tirkiyeyê yên li dijî Kurdan daketiye qada werzîşê û wiha domand: ”Nijadperestiya ku bi rêya lîstikvanekî futbolê li dijî gelê Kurd tê rewakirin, bi awayekî zelal li holê ye.”
KON-MED bang li UEFA’yê kir ku peywira xwe bi cih bîne û got: “Em bang li rayedarên UEFA’yê dikin ku tavilê lêpirsînek li ser vê mijarê bidin destpêkirin û gavên pêwîst bavêjin.”
