Li Amed, Êlih û Colemêrgê ji aliyê xizmên windayan û Komeleya Mafên Mirovan (ÎHD) ve çalakî hatin lidarxistin û di çalakiyan de aqûbeta windayan hate pirsîn û hate xwestin ku faîl werin darizandin.
Li Amedê çalakiya ‘’Bila winda werin dîtîn û kiryar werin darizandin’’ ya hefteya 843’yemîn li pêşiya Bîrdariya Mafê Jiyanê ya li Parka Koşûyolûyê ya li navçeya Rezanê hate lidarxistin. Di çalakiya vê hefteyê de aqûbeta yek ji damezrînerê TUM-SAGLIK-SEN’ê Necatî Aydin ê ku di 4’ê Nîsana 1994’an de di bin çavan de hatî windakirin, hate pirsîn.
Sekreterê Şaxa ÎHD’ê Omer Saman di çalakiyê de axivî û bang li desthilatdariyê kir ku ji bo edalet û aşitiya civakî rû bi rûyê paşerojê bimîne. Endamê Komîsyona Xizmên Windayan a ÎHD’ê Firat Akdenîz jî da zanîn ku kujerên Necatî Aydin nehatine darizandin. Piştî ku çîroka Necatî Aydin hate xwendin çalakvanan diyar kirin ku ew ê ji bo hemû winda û cînayetên siyasî tu carî dev ji lêgerîna edaletê bernedin û piştre jî çalakiya rûniştinê hate lidarxistin.
ÊLIH
Li Êlihê jî xizmên windayan û Şaxa ÎHD’ê ya Êlihê, di çalakiya xwe ya hefteya 669’emîn de li pêşiya Bîrdariya Mafên Mirovan a li ser Cadeya Gulîstan li hev kom bûn. Di çalakiyê de pankarta bi nivîsa ‘’Bila winda werin dîtîn û kiryar werin darizandin’’ hate vekirin û aqûbeta Mahmût Demîrel ê ku di 2’yê Nîsana 1994’an de li Êlihê ji aliyê kesên nediyar ve hatî revandin û piştre bi tu awayî agahî jê nehate standin, hate pirsîn.
Teksta daxuyaniyê ji aliyê Rêvebera Şaxa ÎHD’ê Melek Atabay ve hate xwendin û çîroka ku ji aliyê birayê Mahmût Demîrel ve hatî nivîsandin, hate xwendin.
Bi çalakiya rûniştinê re daxuyaniya çapemeniyê bi dawî bû.
COLEMÊRG
Şaxa Colemêrgê ya ÎHD’ê û xizmên windayan di çalakiya xwe ya hefteya 169’emîn de li Kolana Hunerê ya li navçeya Geverê hatin ba hev. Di çalakiyê de pankarta bi nivîsa ‘’Bila winda werin dîtin û kiryar werin darizandin’’ hate vekirin û wêneyên kesên winda hatin hilgirtin û aqûbeta Zekî Altûnbaş ê ku li Yalovayê di bin çavan de hatî windakirin, hate pirsîn.
Çîroka Zekî Altûnbaş ji aliyê endamê Şaxa ÎHD’ê ya Colemêrgç Ozan Akbaş ve hate xwendin û Akbaş ev yek anîn ziman: ‘’Ji bo faîlên vî sucî werin cezakirin em bang li meqamên edlî û siyasî dikin ku li erka xwe rabin. Êdî bes e. Ji bo ku kujerên windayên me bê ceza nemînin divê êdî dewlet dev ji polîtîkaya xwe ya bêcezatiyê berde. Em tim ji bo Zekî Altûnbaş û hemû windayên xwe daxwaza edaletê bikin.’’
Piştî daxuyaniyê çalakiya rûniştinê hate lidarxistin û piştre çalakî bi dawî bû.
