Navenda Civaka Demokratîk a Kurd a li bajarê Bonn ê Elmanyayê ve bi meşekê êrîşên dagirkeriyê û komkujiya sivîlên li Rojava şermezar kir. Bi sedan Kurdistaniyên li ber Navenda Civaka Demokratîk li hev civiyan, pankartên ku balê dikişînin ser êrîşên dagirkeriyê, komkujiyên sivîlan û binpêkirinên mafên mirovan hilgirtin û alên YPG û YPJ’ê vekirin. Beşdaran gelek caran dirûşmeyên “Bijî berxwedana Rojava”, “Yek Yek Kurd Yek e”, “Bijî YPG û YPJ” berz kirin. Piştre ji bo bîranîna şehîdan deqeyek rêz hat girtin û sirûda Ey Reqîb hate xwendin.
Kurdistanî û dostên wan bi kortejan bi dirûşmeyên “Bijî Berxwedana Rojava”, “Bijî Berxwedana Kobanê”, “Bijî Berxwedana Efrîn” û “Terorîst Erdogan” dest bi meşê kirin. Di rêya meşê de belavokên ku sûcên li dijî mirovahiyê û şerê dewleta Tirk û çeteyên wê dikin hatin belavkirin. Girser ji avahiya Yekîtiya Ewropayê ya Bonnê heta navenda bajêr meşiyan û daxuyanî dan.
Di daxuyaniyên bi zimanê Elmanî de hate destnîşankirin ku êrîşên dewleta Tirk li dijî gelê Kurd, nirxên demokratîk û mafên mirovan e. Piştre nûnerê MLDP’ê Roger Stamm ku beşdarî meşê bû, daxuyanî da.
Dayika şehîd Fevzî jî axaftinek kir û got:
“Jiyana min 85 sal derbas bû. Ez ji 20 saliya xwe ve diqîrim: yekîtî, wekhevî û yekîtiya neteweyî. Ez we silav dikim, YPG û YPJ silav dikim. Efrîn, Rojava di bin dagirkeriyê de ne. Em xwedî li Efrîn, Girê Spî, Serêkaniyê nderkevin. Em xwedî li Rojava derkevin. Divê em di her kêliya jiyana xwe de Rojava biparêzin.”
Çalakî piştî daxuyaniyên saziyên Elman ên piştgirî dan meşê bi dawî bû.
