Li Ewropayê mirinên ji ber germahiyê zêde dibin: Di sala 2024’an de 62 hezar kes mirine

Rapora Lancet Countdown a sala 2026’an a ji aliyê zanyarên navneteweyî ve hate amadekirin, nîşan da ku li Ewropayê krîza tenduristiyê ya ji ber guherîna avûhewayê kûr bûye. Li gorî raporê, di sala 2024’an de nêzîkî 62 hezar kesan jiyana xwe ji dest dane.
 
Hate diyarkirin kudi deh salên dawîn de hişyariyên germahiyê li gorî salên 1990’î ji sedî 300 zêde bûne, hema bibêjin li seranserê Ewropayê mirinên ji ber germahiyê zêde bûne.  
 
Li gorî lêkolînê pitik, temenmezin û karkerên derve dixebitin di nava koma ku herî zêde rîsk li ser wan heye de cih digirin. Zanyar diyar dikin ku bandorên guherîna avûhewayê bes ne yên rasterast in di heman demê de newekheviya tenduristiyê ya heyî jî kûrtir dike.
 
Di raporê de hate destnîşankirin ku malbatên xizan girêdayî bûyerên hewayê yên zêde ji sedî 10 zêdetir bi rîska neewlehiya xwarin û vexwarinê re rû bi rû dimînin. Her wiha rîska nexweşiyên têger jî gelekî zêde bûye.
 
Zanyaran dan zanîn ku tevî gefên zêde dibin jî eleqeya raya giştî, siyaset û çapemeniyê ya têkildarî têkiliya avûhewa-tenduristiyê kêm bûye.  Di raporê de hişyarî hate dayîn ku ji ber polîtîkayên lawaz ên li hemberî guherîna avûhewayê her sal bi deh hezaran kes jiyana xwe ji dest didin.
 
Her wiha raporê bal kişand ser hin geşedanên erênî yên weke zêdebûna bikaranîna enerjiya venûker jî û hate destnîşankirin ku ferqa di navbera  hewlên Ewropayê yên heyî û asta krîzê de gelekî zêde ye.