Xwepêşandan ji ber çerxerêya Kevokê ya li taxa Til Hecer a bajarê Hesekê dest pê kir. Bi sedan şêniyên ku beşdar bûn, wêneyên qurbaniyan bilind kirin û pankarta bi nivîsa “Gel û pêkhateyên Hesekê komkujiyên li dijî gelê me yên li peravên Sûriyeyê şermezar dikin” hildan.
Xwepêşandêr ber bi çerxerêya Şehîd Serhed a taxa Miftî ve ketin rê û li vir deqeyek rêzgirtin ji bo giyanê şehîdan rawestiyan.
Endama Kongra Star Beyan Xelîl di xwepêşandanê de axivî û tekez kir ku komkujî û binpêkirinên ku li peravên Sûriyê tên kirin, “tawanên nemirovane û ne exlaqî ne ku li dijî hemû nirxên olî û regezên mirovî ne.”
Beyan Xelîl bang li rêxistinên mirovî kir ku ji bo rawestandina van sûcan demildest destwerdanê bikin û destnîşan kir ku berdewamkirina van komkujiyan bê hesab wê bihêle ku li deverên din jî binpêkirinên zêdetir bên kirin.
Bi navê pêkhateyên Hesekê Ferhan Daûd diyar kir ku ji destpêka şoreşa Bakur û Rojhilatê Sûriyeyê ve heta niha tawan û binpêkirinên li dijî sivîlan ranewestiyane. Her wiha bal kişand ser wê yekê ku herêmên di bin dagirkeriya Tirkiyeyê de, wek Serêkaniyê û Efrînê, hîna binpêkirinên tên kirin.
Daûd her wiha got: “Tiştên ku li peravên Sûriyeyê qewimîn, ne bûyereke cuda ye, lê berdewamiya komkujiyên li Efrîn û Serêkaniyê ne. Ev komkujî bi piştgiriya rasterast a dewleta Tirk a dagirker tên kirin.”
Daûd di dawiya axaftina xwe de banga yekrêziya pêkhateyên Sûriyeyê û dûrketina ji mezhebperestî û nijadperestiyê kir.
Xwepêşandan dirûşmên ku banga yekitiya pêkhateyên Sûriyeyê dikin, bi dawî bû.
Ji 6’ê Adarê ve li herêmên cuda yên perava Sûriyeyê sûcên kuştinê yên li dijî pêkhateya elewî dewam dikin, di encamê de zêdetirî 800 kesan jiyana xwe ji dest dan, piraniya van komkujiyan ji aliyê komên çete yên girêdayî dewleta Tirkiyeyê ya dagirker ve tên kirin.
