Pêvajoya Aştî û Civaka Demokratîk ji aliyê Rêber Apo ve di Sibata 2025’an de hate destpêkirin. Ji bo her kes bibe xwedî nasnameyeke azad Rêber Apo pêşniyara entegrasyonê pêşkêş kir. Di ser pêvajoyê re salek derbas bû; lê belê heta niha di mijara sererastkirinên qanûnî û mafê hêviyê de dewleta Tirk dozên daye bi cih neaniye. Yek ji ciwanên ku baweriya xwe bi fikir û felsefeya Rêber Apo re anî, gerîlayê ji gelê Ereb Dilbirîn Rojava piştî ku pêvajoya Aştî û Civaka Demokratîk destpê kir, li ser bingeha tevlîbûna li pêvajoyê tevlî nava refên têkoşîna azadiyê ya Kurdistanê bû.
Dilbirîn Rojava ku weke ciwanekî enternasyonalîst kete bin bandora fikrê neteweya demokratîk, anî ziman ku xwest bi ked û têkoşînê bibe pirek di navbera gelan de. Dilbirîn Rojava ku bi bandora Rêber Apo ya 27’ê Sibata 2025’an tevlî nava refên têkoşînê bû got, “Ez ji gelê Ereb im û ji bajarê Reqayê têm. Min kesayetiya hevrê Mazlûm û Kemal Pîr nas kir û wan bandoreke mezin li kesayetiya min kir. Bi taybetî banga Rêber Apo ya 27’ê Sibatê bû zemîn ku rêya xwe ya azadiyê diyar bikim. Rêber Apo li gel ku li zindana Îmraliyê tê ragirtin, gaveke dîrokî avêt. Em jî weke şervanên vê tevgerê gelekî ji vê bi bandor bûn. Di vê oxirê de Tevgera me gelek şehîd da. Gava ku Rêber Apo avêt bi rastî jî bandoreke mezin li min kir; ez jî hatim çiyayên Kurdistanê û ez ê heta dawiyê xeta Rêber Apo dewam bikim.
Pêvajoya ku Rêber Apo da destpêkirin ji bo hemû gelan e, ji ber ku Rêber Apo rewşa li Rojhilata Navîn bi taybetî krîzên ku pê re rû bi rû ye analîz kir û ev pêvajo da destpêkirin. Ev yek gaveke dîrokî ye. Ji bo gelê me di nava aramiyê de karibe bijî û em jî bigihêjin azadî û serketinê, em ê li ser xeta Rêber Apo israr bikin. Em ê analîzên ku Rêber Apo kir û tiştên hînî me kir, bi têkoşîna xwe bixin meriyetê. Dijmin dibêje, ‘şer qediya, bila her kes vegere mala xwe’, lê belê kes nikare bandorê li me bike û bibêje vegere mala xwe. Ji ber ku em tevlî fikrê azad bûn. Ji ber vê em li çiyayên azad in û li ser xeta şehîdên xwe dimeşin. Dilsoziya me ya bi Rêber Apo û hevrêyên me yên şehîd re her roj hîn mezin dibe. Kes nikare me ji vê xetê dûr bizîne.”
