Festîvala Fîlmên Dokûmanter a Amedê ku îsal cara 10’emîn ji aliyê Komeleya Akademiya Sînema ya Rojhilata Navîn û Şaredariya Peyasê ve tê lidarxistin, îsal bi dirûşma “Em li vir in, li ber dara gûzê ne” pêk tê.
Festîval wê di navbera 25 û 29’ê Îlonê de were lidarxistin û li çar kategoriyên cuda xelatan bide. Di çarçoveya festîvalê de her wiha wê piştgiriyê bide sê dokûmanteran. Di festîvalê de ku li bajêr veguheriye bîrekê, bi taybetî wê bala xwe bide ser mijarên civakî; karên bi naveroka ekolojî, jin, çand, xizanî û bîrê li pêş bin.
Festîval li qada dokûmanterê jî bi karên xwe yên afirîner balê dikişîne.
BI ÇAR FÎLMAN DESTPÊ KIR
Ji endamên Komîteya Amadekar a FilmAmedê Omer Fîdan anî ziman ku festîvalê ji sala 2011’an û vir ve hişek afirandiye û diyar kir ku wan bi xurtî dest bi karên festîvalê kirine. Fîdan ragihand ku festîval ne tenê nîşandana fîlman e, bi atolye û karên piştevaniyê rêwîtiyeke demdirêj e.
Fîdan işaret bi rêveçûna dîrokî ya festîvalê kir û got, “Rêwîtiya festîvalê sala 2011’an li Navenda Çand û Hunerê ya Cigerxwîn destpê kir. Di wê rêwîtiya demdirêj de me îro 10 sal li pey xwe hişt. Destpêkê festîvalê bi çend fîlman destpê kir. Par zêdeyî 700 fîlmên dokûmanter serî li festîvalê dan. Veguherî festîvalekê ku xwe mezin dike, bi pêş ve dibe û belav dibe.”
‘VEGUHERÎ HIŞEKÎ’
Fîdan ragihand ku di festîvalê de keda gelek kesî heye, yek ji du festîvalên fîlmên dokûmanter ên herî girîng li Tirkiyeyê tên lidarxistin Festîvala Fîlmên Dokûmanter a Amedê ye û got, “Ev festîval derhêneran, hunermendan û her kesên ku bala xwe li ser hunerê ye digihîne hev. Bi vî rengî veguherî kevneşopiyekkê. Festîval hem xwe mezin dike, hem jî bi pêş ve dibe. Festîval di heman demê de ji bo parastina hişa civakî bi roleke girîng radibe. Ev festîval di heman demê de rastiya Kurdistanê bi rêya sînemayê digihîne civakê. Ji ber vê yekê dirûşma me bi vî rengî ye; ‘Em li vir in, li ber dara gûzê ne’. Em bi rêya vê festîvalê hem xwe hem jî hebûna xwe nîşan didin.”
Fîdan diyar kir ku festîval wê çar rojan dewam bike û got, “Çar kategoriyên xwe yên xelatan heye. Ev jî bi vî rengî nıe: Xelata Heqîqet û Edaletê ya Orhan Dogan, Xelata Azadiyê ya Leyla Qasim, Xelata Bexçeyên Hewselê û Xelata Gel a Kemal Korkût.”
‘EV FESTÎVAL JI BO HER KESÎ YE’
Omer Fîdan di serî de ciwan bang li gel kir ku xwedî li festîvalê derkeve û got, “Em bi hev re vê hişî bigihînin paşerojê. Hem bi fîlman hem jî bi atolyeyan em li qadan bin. Em çîrokên xwe bi derfetên herî biçûk jî be li ser dikê nîşan bidin. Ev festîval festîvala her kesî ye.”
