Duh xelkê 80’ê gundên sînorê bajarokê Şêladizê ya ser bi navçeya Amêdî ya girêdayî Parêzgeha Dihokê ku ji Eşîra Rêkaniyanin, hewldan vegerin ser gund, cih û warên xwe ku bi salane ji aliyê dewleta Tirk ve tim pêşiya wan tê girtin û hatine dagirkirin. Pêşiya xelkê ji aliyê hêzên ser bi PDK’ê ve hatibû girtin û alozî derketibû.
Li aliyê din Zêdan Adil Sîtekî ku yek ji pêşengê serekî yê xwepêşandana gel bû, di dema xwepêşandanê de hatibû binçavkirin û piştî hate berdan destnîşan kir ku hêzên ser bi PDK’ê ji bo pêşiya xwepêşandanê bigire ew revandibû.
Zêdan Adil anî ziman ku binçavkirin û revandin wê vîna wan lewaz neke û got: “Bi vekirî ji bo desthilatê dibêjîn ku heta dilopa xwîna xwe ya dawî, çok li ber kesê nadanin, ji daxwazên xwe venagerîn.”
Li gorî agahiyên Rojnewsê, îro hejmareke kesayetî û rûsipiyên Şêladizê bi mebesta rewşa giştî û peydakirina çareseriyê serdana Navenda 18’an a PDK’ê ya li Ameêdiyê kiriye. Bi navê xelkê herêmê hişyariyên dawî gihandine aliyên berpirs û da xuyakirine ku eger dorpêça li ser gundên wan neyê rakirin, rêya wan neyê vekirin rewş wê ji destê wan derbikeve. Wê nerazîbûn mezin bibin û bigihêje asteke metirsîdar û fireh bibe.
Girtina rêya devera Rêkan bûye sedema valabûna 206 gundên li sînorê Amêdî û 80’ê gundên Şêladizê. Rewşa Şêladizê niha di qonaxeke hestyar de ye.
