Piştî banga berxwedanê ya Hêzên Sûriyeya Demokratîk (QSD), şêniyên Hesekê daketin kolan û meydanan û amadebûna xwe ya ji bo parastina bajarê xwe nîşan dan. Ev tevgera gel tenê li Hesekê sînordar nebû. Bi hezaran şêniyên bajar, bajarok û gundên kantonên Cizîrê û Firatê ji bo piştgiriya hêzên xwe, QSD û YPJ’ê xwepêşandan kirin û hevgirtina xwe bi hêzên xwe re anîn ziman.
Li gorî nûçeya ANHA’yê, bajarê Hesekê di rewşek asayî û ewlehiyê de ye û şênî bi karên xwe yên rojane mijûl dibin. Hêzên QSD’ê, YPJ’ê li eniyên pêş parastina gel dikin.
Di warê xizmetên giştî de, nanpêjxane bi rêkûpêk dixebitin da ku hewcedariyên şêniyan bicîh bînin û dikanên xwarinê hatine vekirin.
Di warê tenduristiyê de, karmendên bijîşkî yên li Nexweşxaneya Gel karê xwe didomînin û dermanxane ji bo peydakirina hewcedariyên bijîşkî vekirî dimînin.
