Li navçeya Hewag a Rihayê bo gerîlayê HPG’ê Muslum Aslan (Firat Tolhildan) ku di sala 2018’an de li Avaşînê şehîd bibû, konê sersaxiyê hate danîn.
Bi pêşengiya Komeleya Alîkarî, Piştgirî û Çandê ya bi Malbatên ku Xizmên Xwe li Welatê Qedîm Winda Kirine (KATDER) serdana konê sersaxiyê hate kirin. Nûnerên partiyên siyasî, rêxistinên girseyî yên demokratîk û şêniyên herêmê tevlî serdanê bûn.
Beşdaran bi hilgirtina wêneyê Muslum Aslan ji taxa kilan ber bi konê sersaxiyê ve meşiyan û dirûşmeyên “Şehîd namirin”, “Ey şehîd xwîna te li erdê namîne” berzkirin. Girseyê tevî astengiya cendirmeyan meşa xwe domand û gihiştin cihê sersaxiyê.
Girse ji aliyê malbatê ve bi dirûşmeyan hate pêşwazîkirin. Hevseroka KATDER’ê Makbûlê Yavuzer destnîşan kir ku ew ê têkoşîna wan heta dawî bidomînin.
Serdan piştî duayan bi dawî bû.
