Di hevdîtinê de derbarê pêvajoya aştiyê û çareseriya demokratîk de nirxandin hatin kirin.
Tulay Hatimogulları destnîşan kir ku “Banga Aştî û Civaka Demokratîk” ya Rêber Apo ne tenê ji bo gelê Kurd e, lê “rizgariya 86 milyon welatiyan” e.
Tulay Hatimogulları diyar kir ku pêvajoya aştiyê divê tenê wekî pêvajoyek di navbera dewlet û PKK’ê de nemîne û got, “Pêvajoya aştiyê ne tenê di navbera PKK’ê ya ku xwe fesix kiriye û dewletê de, ne jî tenê di navbera Birêz Ocalan a li Îmraliyê û dewletê de an jî bi mîlyonên ku bi DEM re dimeşin re nayê civakîkirin. Rêya herî girîng a civakîkirina aştiyê, bi xwedîderketina xurt a hemû hêzên demokrasiyê, rêxistinên civaka sivîl, rêxistinên ked û pîşeyî, beşên ji gel û baweriyên cuda yên li Tirkiyeyê ye. Erk û berpirsyariya herî girîng ji bo me hemûyan ew e ku em civakîbûna aştiyê pêk bînin.”
Tulay Hatimogulları anî ziman ku qonaxa yekem a pêvajoyê temam bûye û êdî “derbasî qonaxa duyemîn bûne” û diyar kir ku ew ji hikûmetê gavên pêşdeçûnê hêvî dikin. Hatimogulları destnîşan kir ku di nav van gavan de, berdana girtiyên nexweş ên li girtîgehan, vekişandina qeyûman û pêkanîna biryarên DMME’yê hene.
Tulay Hatimogulları got, “Bêguman avêtina van gavan dê di civakê de gavên pêbawerîya pir zêde be” û wiha got: “Banga aştî û civaka demokratîk ne tenê rizgariya gelê Kurd e. Rizgariya 86 milyon welatiyên ku li vî welatî dijîn e.”
Hevberdevkê HDK’ê Meral Danış Beştaş jî bi bîr xist ku di pêvajoya aştiyê de cara yekem komîsyonek hatiye avakirin û got, “Pêwîste her kes bibîne ku ev pirsgirêk ne mijara terorê ye, pirsgirêkeke siyasî ye.”
Meral Danış Beştaş diyar kir ku ji bo pêşveçûna pêvajoyê pêwendiya rasterast bi Îmraliyê re şert e û got, “Aştî bêyî demokrasî mayînde nabe. Ger rewşeke hiqûqî û zagonî nebe, sibe rewşek cuda çêdibe. Heta hefteya bê Wezîrê Parastina Neteweyî û MÎT dê bêne guhdarîkirin. Divê em jî teqez guhdarî birêz Ocalan bikin. Li her derê cîhanê çareserî bi vî awayî çêbûye. Pêşbîniya me ya çûyîna Îmraliyê di demeke nêz de heye. Hêvîdar im ev yek pêk were û kar û barê vî welatî rast here.”
