Li gorî nûçeya The Guardianê Wezareta Karên Hundir (Home Office) dê ji bo yekem car hişyariyeke fermî ji nêzî 130 hezar kesan (xwendekar û malbatên wan) ra bişîne. Di nameyê da tê ragihandin ku kesên ku statuya wan a zagonî tune ne divê welat biterikînin naxwe ew ê werin dersînorîkirin.
Di peyamê da ev gotin hene: “Heke hûn serlêdaneke penaberiyê ya bêbingeh bikin ew ê bi lez û biryardarî bê redkirin. Heke mafê we yê zagonî ji bo mayîna li welat tune be divê hûn derkevin. Heke hûn dernekevin em ê we dersînor bikin.”
ZÊDEBÛNA SERLÊDANÊN PENABERIYÊ
Di sala 2024an da nêzî 16 hezar xwendekaran di dawiya destûra xwe da serlêdana penaberiyê kirin. Ev hejmar li gorî sala 2020an şeş car zêdebûn nîşan dide. Li gorî daneyên fermî, xwendekarên xwedî destûrê niha koma herî mezin a serlêdanên penaberiyê pêk tînin e. Her çiqasî wezîr dipejirînin ku hin serlêdan rewa ne jî lê piraniya wan wekî stratejî ji bo mayîna li welat têne bikaranîn. Ji bo astengkirina vê rewşê hikûmetê dema rûniştina piştî derçûyînê ji du salan daxist 18 mehan.
JI CÎHANA AKADEMÎK BERTEK
Ev tevdîra nû di cîhana akademîk da bi bertek hate pêşwazîkirin. Sekretera Giştî ya Sendîkaya Mamoste û Lêkolîneran Jo Grady diyar kir ku ev “êrîşeke li ser xwendekarên navneteweyî” ye. Gadry got “Ev gav bi çareserkirina zêdebûna destûrê ra ne têkildar e, ev hewldanek e ji bo bizarkirina gotinên Partiya Reformê ye.” Gadry destnîşan kir ku divê hikûmet vîzyona Brîtanyayeke bihêz û mêvanperwer bi xwendekarên navneteweyî re biparêze.
Hikûmet jî bi vê tevdîrê dixwaze nîşan bide ku ne tenê koçberên nezagonî yên ji Deryaya Manşê tên lê her wisa herikîna koçberiyê ya xwendekar û malbatên wan ên bi rêyên zagonî hatine welat jî qontrol dike.
