Di çarçoveya Roja Têkoşîna dijî Tundiya li ser Jinan a Cîhanê ku dikeve 25ˊê Mijdara her salê de, li bajarên Til Temir, Dirbêsiyê, Şedadê û Çilaxa yên kantona Cizîrê, rêzeçalakiyên hişmendî û rêxistinî ku saziyên jinan û civakî bi armanca pêşxistina çanda wekhevî, têkoşîna dijî tundiyê û nijadeperestiya dijî jinan li dar dixin, hatin lidarxistin.
LI TIL TEMIRÊ DEWREYA PERWERDÊ YA MÊRAN JI BO PÊŞXISTINA HIŞMENDIYA CIVAKÎ
Li bajarê Til Temirê, Kongra Star dewreyeke perwerde ji bo mêran li hola Meclisa Malbatên Şehîdan heta 3 rojan vekir. Di dewreyê de bi dehan nûnerên ji saziyên civaka sivîl, partiyên siyasî û endamên komînan beşdar bûn.
Di vekirina dewreyê de, endama Komîteya Edaletê ya Mala Jinan Meha El Wecrî bixêrhatina beşdaran kir û diyar kir ku têkoşîna dijî tundiya li ser jinan ne tenê berpirsiyariya jinan e, lê erka komî ye û pêdiviya wê bi beşdariya aktîf a mêran di guhertina vê zihniyetê de heye.
Di dewreyê de dê semîner bên dayîn, nîqaşên der barê yasaya malbatê de bên kirin, û şêweyên têkoşîna dijî tundiya li ser jinan û bandora adatên civakî yên neyênî bên şîrovekirin.
Roja yekemîn bi rûniştinek vekirî bi dawî bû û tê de nîqaşên li ser pişgiriya dozên jinan û berpirsiyariyên di guhertina civakê de hatin kirin.
MECLISA JIN YA PYD’Ê LI DIRBÊSIYÊ CIVÎNEK LI DAR XIST
Meclisa Jinan a Partiya Yekitiya Demokratîk (PYD) li bajarê Dirbêsiyê civîneke berfireh der barê mijarên tundiya li dijî jinê û rêbazên xurtkirina jinan di tevahî waran de li dar xist.
Civîn bi deqeyeke rêzgirtinê dest pê kir, paşê endama rêveber a Meclisa Jinan a PYDˊê Ebîr Hesen destnîşan kir ku bingehê fikir û xwenaskirina jinê û azadiya wê fikirê Rêber Apo ye.
Ebîr Hesen diyar kir ku jinan di rêya azadî û naskirina mafê xwe de, gava yekem avêt û dikarin roleke rast di civakê de bilîzin.
Di dawiya civînê de beşdaran diyar kir ku pêwîstî bi hewlên hevbeş di navbera jin û saziyên sivîl de ji bo rûbirûbûna tundiyê bi hemû şêweyên wê heye. Her wiha hat gotin ku divê rola jinan di civakê de were bihêzkirin.
LI ŞEDADÊ SEMÎNEREKE JI BO AVAKIRINA SÛRIYEYÊ HATE LIDARXISTIN
Li bajarê Şedadê Melisa Jinan a PYD’ê bi sernava ‘’Ber bi avakirina Sûriyeyeke demokratîk bi pêşengiya jina azad” semînerek hat lidarxistin.
Hijmareke jin, endamên PYDˊê û rêxistinên civaka sivîl tevlî semînerê bûn. Endama Nivîsgeha Jinan a PYDˊê ya katona Cizîrê Neda Mihemed, axivî û behsa diyardeyên tundiya civakî, aborî û çandî li ser jinan kir.
Neda Mihemed behsa zewaca zarokên keç kir û got ew diyarde yek ji şêweyên herî berbiçav ên tundiya berdewam e, ji ber ku keçan ji zarokatiya wan bêpar dihêle û bandoreke neyînî li paşeroja wan dike.
Neda da zanîn ku pêdiviya van diyardeyan bi guhertinên bingehîn di raman û perwerdeyê de heye. Bi saya fikir û felsefeya Rêber Apo êdî jin îro hêmaneke aktîf e û tevî mêr di hemû warên siyasî, aborî, civakî û leşkerî de dixebite.”
Endama Nivîsgeha Jinan a PYDˊê ya kantona Cizîrê Şêrîn Oso jî anî ziman ku jin ji serdemên berê ve di avakirina civakê de şirîkên bingehîn in, lê ji ber edet û kevneşopiyên sînordar hatine paşguhkirin, lê divê cihê jinê di tevahî mafên wê de werin berçavgirtin.
Semîner bi girîngîdayîna lidiarxistina kampanyayên hişmendî û berdewamkirina têkoşîna dijî tevahî şêweyên tundiyê, xebitîna li ser bicihanîna nirxên wekhevî û azadiyê, bi dawî bû.
ÇIL AXA
Girêdayî mijarê, Kongra Star a bajarê Çilaxa li hola PYDˊê bi amadebûna hejmareke mezin a jinan, xebatkarên saziyên sivîl, xizmetguzarî û jinan, panelek li dar xist.
Panel ji 3 mijarên sereke pêk hat. Endama rêveber a Mala Jinan a Çilaxa Huda Derwêş mijara yekê ya li ser têgeha tundiyê, sedem û ajoyên berdewamkirina wê şîrove kir.
Huda destnîşan kir ku tundiya li dijî jinê dozeke cîhanî ye, rihê wê vedigerin pergala baviksalarî û hegemoniya zilamperestiyê.
Huda anî ziman ku zewaca temenbiçûk û tundî êdî diyardeyên serdema nû ne, li kêlek wê jî jin li ser medyaya dîjîtal di gef û şantajkirinê re derbas dibin.
Endama Hêzên Ewlekariya Hundirîn-Jin Rîhab Mihemed El Ubeyd di mijara duyemîn de bal kişand ser rola saziyên ewlehiyê di têkoşîna dijî tundiyê û berevaniya jinan di aliyê yasayê de û destnîşan kir ku “Piranî dozên ji wan re tên rakirin jêdera wan jin in, li gorî yasayên cezayê ya li Herêma Bakur û Rojhilatê Sûriyeyê dan û standin bi wan re tê kirin.”
Di mijara sêyemîn de endama rêveber a Kongra Star Selamat Remo jî behsa rola tevgerên jinan di têkoşîna li dijî tundiya li ser jinan kir û diyar kir ku adet û kevneşopiyên eşîrtî û lawaziya hişmendiyê hîna li pêş pêşketina jinan astengî ne.
Selamat anî ziman ku tevgerên jinan li gorî fikir û felsefeya Rêber Apo ku rizgariya jinê bi rizgariya civakê ve girê dide, dixebite.
Piştre jinan nîqaşên xwe kirin û bal kişandin ku berxwedana li dijî sedemên tundî û ajoyên wê berpirsiyariya komî ye û pêdiviya wê bi girankirina yasayên pêşîlgirtinê û berevaniya jinan heye.
Di dawiya panelê de dirûşme “Jin, Jiyan, Azadî” hat berzkirin.
