Îro bi sedan şêniyên Kantona Firatê endamên sazî û dezgehên girêdayî Rêveberiya Xweser, şervanên Komandos Hebûn (Ebdulqadir Ehmed), Çiya (Mihemed Kenco), Leşker Kobanê (Necîm Keriho Eto) ku di 3’yê Nîsana 2025’an de di encama qezaya trafîkê ya li ser rêya Reqa-Hesekê de şehîd bûbûn û Dilşêr Kobanê (Yasir Şêx Bozan) di 2’yê Çileya 2025’an de li Bendava Tişrînê û şervana YPJ’ê Destan Rojhilat (Derya Hecî) ku di 8’ê Çileya 2025’an de li Bendava Tişrînê şehîd bûbûn, bi merasîmeke bi girseyî û biheybet li Pakrewangeha şehîd Dîcle spartin axê.
Merasîm bi deqeyek rêzgirtinê destpê kir. Hevseroka Partiya Yekitiya Demokratîk a Kantona Firatê Bêrîvan Îsmaîl sersaxî ji malbata her pênc şehîdan re xwest û diyar kir ku ew bi saya têkoşîn û berxwedana şehîdan gihiştine vê astê.
Endamê Rêveberiya Meclîsa Leşkerî ya Kobanê Simaîl Simaîl wiha got: “Divê em her tim xwedî li mîrateya şehîdên xwe derkevin û şopdarên rêya şehîdên xwe bin.”
Keça Xalê şehîd Çiya, Almas Romî jî axivî û wiha got: “Bi dehan êrîşên dagirkeriya Tirkiyeyê bi ser me tên, lê bi hêza QSD’ê bi hêza gel û hêza şerê gel ê şoreşgerî me hişt ku dewleta Tirk û hevalbendên wê têk biçin, ji ber vê yekê tiştê ku ji me tê xwestin divê em têkoşîn û berxwedana xwe hîn xurttir bikin.”
Pişte wesîqeyên şehîdan hatin xwendin û radestî malbatên wan hatin kirin.
Cenazeyên şehîdan bi dirûşma “Şehîd namirin” hatin veşartin.
