Ji Fermandarên YPJ’ê Sorxwîn Rojhilat û Azadî Dêrik ku di 11’yê Sibata 2024’an de, di êrişa dewleta Tirk ya li ser avahiya Federasyona Gaziyên Herêma Bakur û Rojhilatê Suriyeyê pêkhat de gihiştibûn şahadetê, îro ji aliyê Komîteya Malbatên Şehîdan a Wargeha Mexmûrê ve hate bibîr anîn.
Bîranîn li Komîteya Malbatên Şehîdan a Wargeha Penaberan ya Şehîd Rustem Cûdî (Mexmûr) bi tevlîbûna gel û xebatkaran bi deqeyek rêzgirtinê destpê kir.
Piştî rêzgirtinê li ser navê Komîteya Malbatên Şehîdan, Endama komîteyê Hezar Nerexî axivî û di serî de sersaxî ji Rêber Apo, Hevalên Gazî û tevahî gelê azadîxwaz re xwest û got: “Di têkoşîna azadiyê de gelek ked û bedel hatine dayîn. Ev destkeftiyên niha di destê me de, bi saya şehîdanin. Divê em hîn zêdetir xebat bidin meşandin da ku em bikarin bibin layiqê keda wan şehîdan. Şehîd Soxwîn û Azadî xwedî kedek mezin bûn û gaziyên tevgera azadiyê bûn. Li her derê xebat dan meşandin û di şerê li dijî DAIŞ’ê de xwedî rolek mezin bûn. Em bi rêz û minnetdarî wan carek din bibîr tînin. Wê bîranîna wan bibe rênîşana meşa me ya azadiyê.”
Piştî axaftinê sînevîzyona ku li ser jiyan û têkoşîna herdu şehîdan hatibû amadekirin, hate temaşekirin û bîranîn bi diruşmeya ‘Şehîd Namirin’ bi dawî bû.
