Li salona konferansê ya Zanîngeha Silêmaniyê, Dîdara Ciwan û Koçberiyê hate lidarxistin. Di berdewamiya dîdarê de bavê yek ji ciwanên di rêya koçberiyê de windabûyî, Serokê Rêxistina Ciwanên Raperînê Ehmed Hesen, Rêveberê Hemahengî û Diyalogê ya Zanîngeha Silêmaniyê Dr. Ebdulfetah daxuyaniyek çapemeniyê li ser koça welatiyên Herêma Kurdistanê dan.
Bavê yek ji ciwanên di sala 2021’an de di rêya koçberiyê de windabûyî Resûl Fetah di daxuyaniyê de axivî û got: “Sedema koçberiya zarokên me ji ber nebûna derfetên jiyanê bû. Em bang li hikûmeta Herêma Kurdistanê dikin ku ji bo dîtina kurê me yê winda ku çar salin winda ye, alîkariyê bike.”
Serokê Rêxistina Ciwanên Raperînê Ehmed Hesen di heman daxuyaniyê de da zanîn ku ji serê salê ve 2 hezar û 300 ciwan ji devera Raperînê koçî derve kirine û got: “Hinek ji wan hatine binçavkirin, hinek ji wan mirî hatine vegerandin. Tenê meha borî, cenazeyên 5 koçberên ciwan hatin vegerandin. Sedema lidarxistina vê dîdarê pêşkêşkirina çareseriyekê ji bo koçberiya ne yasayî ya ciwanane ku tenê di sala 2024’an de 6 hezar û 800 ciwan ji Herêma Kurdistanê koçber bûne. Ji ber vê yekê, em bang li hikûmetê dikin ku sala bê koçberiya ciwanan kêm bike û koçberên winda bibîne.”
Ehmed Hesen destnîşan kir ku sedema çûyîna ciwanan ji ber nebûna jiyanek baş û nebûna derfetên kare, lewma divê hikûmeta Herêma Kurdistanê helwestek ciddî bigire û derfetên kar ji bo ciwanan peyda bike, taybet bala xwe baş bide ser devera Raperîn.
Têkildarî heman mijarê Rêveberê Hemahengî û Diyalogê ya Zanîngeha Silêmaniyê Dr. Ebdulfetah got: “Wek Zanîngeha Silêmaniyê, me hewl da ku bi civaka sivîl û saziyên hikûmetê re ji bo têkoşîna li dijî diyardeya koçberiyê bixebitin. Ji ber vê yekê îro em ê di du panelan de li ser pirsgirêkên ciwanan nîqaş bikin.”
