Şêniyên kantona Reqayê îro meşeke girseyî li dar xist û piştgiriya xwe ya ji bo Hêzên Sûriyeya Demokratîk (QSD) nîşan da.
Bi hezaran şênî, nûnerên Rêveberiya Xweser a Demokratîk û sazî û meclisên girêdayî wê, tevgerên jin û ciwanan û hêzên leşkerî û ewlehiyê li Qada Jina Azad a bajêr kom bûn.
Girse li kolanên bajarê Reqayê geriya û li Çerxerêya El Neîm kom rawestiya. Li wir şêx Zuhêr El Ebdela yê şêxê eşîra Benî Esîd E Zubêdî axivî û komkujiya ku ji aliyê komên girêdayî hikumeta veguhêz a Sûriyeyê ve li Dêr Hafir pêk hatiye, şermezar kir. El Ebdela got hikumeta veguhêz berpirsyara van kiryaran e.
Zuhêr El Ebdelah diyar kir ku QSD ji nava êşa gelê Sûriyeyê derketiye holê û hemû pêkhateyên Sûriyeyê yên Kurd, Ereb, Suryan û Tirkmen cihê xwe di nav de digirin û di şerê li dijî DAIŞ`ê û parastina herêmê de berdêlên mezin dane.
Zehra Şilaş jî li ser navê jinên Reqayê axivî û piştgiriya wan a ji bo QSD`ê anî ziman. Zehrayê daxuyaniyên Ehmed El Şeri yên ku daxwaza alîkariyê ji artêşa Tirk dikir, wekî xiyanet bi nav kirin.
Di dawiya axaftina xwe de Zehra Şilaş sûcên ku ji aliyê dewleta dagirker a Tirk ve hatine kirin şermezar kirin û bang li hikumeta veguhêz a Sûriyeyê kir ku berpirsyariyên xwe pêk bîne û dagirkeriya Tirk ji Sûriyeyê derxe.
Meşa girseyî bi berzkirina dirûşmên ji bo piştgiriya QSD`ê bi dawî bû.
