Di çarçoveya peymana 30ˊê Çileyê ya di navbera QSDˊê û hikûmeta demkî ya Sûriyeyê de, şandeyeke hikûmeta demkî îro serdana Rêveberiya Zeviyên Petrolê ya Rimêlan kir.
Şande ji Rêveberiya Ewlehiya Derî û Balafirgehan Ehmed El Ehmed, alîkarê serokê Desteya Giştî ya Balafirgehan a Sivîl Emced Nexal, gerînendeyê Peywendiyên Saziyan Sefwan Şêx Ehmed, cîgirê serokê Şîrketa Sûriyeyê ya Petrolê Welîd El Yûsif, berpirsê zeviyan Xalid Elêc û endazyarê Şîrketa Sûriyeyê ya Petrolê Elî Qurunful û berpirsê Piştevaniya Cîbicîkar Macid Hebîb pêk dihat.
Şandeya Rêveberiya Giştî ya Zeviyên Rimêlanê Ehmed Îbrahîm, cîgirê Rêveberiya Kar û Barên Petrolê Diyab Xelêf, Cîgirê Rêveberiya Kar û Barên Malî Ebduselmam û Cîgirê Rêveberiya Kar û Barên Pîşeyî Îsam Kurdî şandeya hikumetê pêşwazî kir.
Civîn li Rêveberiya Ziviyên Petrolê ya li navenda Rimêlanê dûrî ragihandinê hat lidarxistin. Li gorî çavkaniyan her du aliyan li ser mekanîzmeya xebata rêveberiyê axivîn.
Piştre, civîneke çapemeniyê hat lidarxistin. Di civîna çapemeniyê de Welîd El Yûsif spasiya Rêveberiya Rimêlanê û Rêveberiya Xweser li ser xebata wan a parastina tevahî bîran û alavên wan kir û got ew cih saxlem in.
El Yûsif got: “Em spasiya kedên ji bo parastina avahiyên petrolê hatin dayîn dikin. Em li hêviya hevkariyê ne ku bikeve ximzetî tevan. Armanc ew e ku Sûriyeya yekgirtî ji bo tevan be. Petrolê dewlemendiyeke neteweyî ye, ji bo tevahî gelê Sûriyeyê ye.”
Serdana şandeya hikumeta demkî ji Rêveberiya Zeviyên Petrolê ya Rimêlanê re, di çarçoveya proseya pêkanîna lihevkirina 30ˊê Çileyê de ye. Duh jî li balafirgeha Qamişloyê di heman çarçoveyê de hevdîtin pêk hat.
