Platforma Saziyên Demokratîk, Partiya Wekhevî û Demokrasiyê ya Gelan (DEM Partî) û Kongreya Demokratîk a Gelan (HDK) xwestin meşek girseyî ji Qada Aksarayê ber bi Saraçhaneyê li dijî êrişên çeteyên dewleta Tirk, DAÎŞ û HTŞ’ê yên li ser Rojavayê li dar bixin. Bi sedan welatî li Qada Aksarayê kom bûn û dirûşmeyên wekî “Bijî berxwedana Rojava”, “Jin, jiyan, azadî”, “Bijî Rêber Apo”, “Bijî biratiya gelan” û “HTŞ’ya Kujer, hevkar AKP” berz kirin.
Welatiyan pankartên bi Kurdî û Tirkî yên wekî “Warê hebû nê kaniya jina bê te ez kê me”, “Dijminê rastî di welatê wan de ye”, “2+2=1 Rojava” û “Her keziyek ji porê keçên me bi qasî tevahiya cîhana hêja ye” hatin hilgirtin.
Berî meşê, bi sedan kes bi komî di kolanên cirbicur ên Meydana Aksarayê de meşiyan û dirûşme berz kirin. Saraçhane û Meydana Aksarayê beriya çalakiyê ji aliyê polîsan ve hatin dorpêçkirin. Tevî ku polîsan gaza rondikrêj bi kar anîn û zext li welatiyan kirin jî, gel kolan terk nekir. Her çend hin ji girseyê di bin dorpêça polîsan de man jî, beşeke mezin nerazîbûnên xwe li gelek kolanên Aksarayê nişan dan.
‘BERXWEDANA ROJAVA TESLÎM NAYÊ GIRTIN’
Piştî berxwedaneke dirêj, rêxistinên girseyî yên demokratîk daxuyanî dan. Ji Rêveberiya DEM Partiyê ya Stenbolê Ayfer Çelîkê daxuyanî xwend û got ku êrişên ku ji aliyê HTŞ’ê ve li taxên Şêxmeqsûd û Eşrefiyê yên Helebê hatin kirin, jiyana jin û zarokan binpê kirine. Ayfer Çelîkê destnîşan kir ku ev helwesta dijminane stratejiyeke tarî ye ku ne tenê armanc dike ku herêmê têk bibe, di heman demê de armanc dike ku aştî û pêvajoyên demokratîk li Tirkiyeyê jî têk bibe. Ayfer Çelîkê got: “Em bi zelalî dibêjin: Ev êriş berdewamiya wan êrişên tarî yên li ser wargehên Durzî û Elewiyan li Siwêdayê ne! Armanc ruhê piralî yê Sûriyeyê ye; armanca wan a yekane ew e ku mirovan li dijî hev sor bikin. Gelê Kurd û HSD’ê li dijî DAIŞ’ê dîrok nivîsandine; ew tekane garantiya aştî û demokrasiyê li Rojhilata Navînê ne. Cîhan vê rastiyê dizane, lê hêzên herêmî hewl didin ku wê bitepisînin ji ber ku ew pêşeroja xwe di çeteyên HTŞ’ê de dibînin.”
Ayfer Çelîkê di dawiya daxuyaniyê de wiha bang kir: “Banga me ji bo hemû cîhanê: Dev ji temaşekirinê berdin! Divê ev êriş werin rawestandin û hevkarên vî sûcî tavilê werin eşkerekirin. Bêdengî hevkariya vî sûcî ye. Gelê Kurd bi tenê nehêlin; rê nedin van êrişên hovane. Yan na, mirovahî dê winda bike.”
MEŞ DIDOME
Tevî hemû hewldanên polîsan ji bo astengkirinê jî, gel li kolananan meşê didomîne. Polîsan êrişî meşê kirin û gelek kes ku rojnamevan û siyasetmedar jî di nav de ne, binçav kirin.
