Li navçeyên Esenyûrt û Bahçelîevler ên Stenbolê Endamên DEM Partiyê bi armanca protestokirina êrîşên li ser Bakur û Rojhilatê Sûriyeyê meş li dar xistin û daxuyaniya çapemeniyê dan. Çalakî li pêşiya Rêxistina Navçeyê ya Esenyûrdê dest pê kir û pankarta bi nîvîsa; ‘’Li hemberî êrîşên li ser Rojava bisekine! Rojava wijdan e, berxwedan e, azadî ye û nayê teslîmgirtin’’ hate vekirin. Meşvanan gelek caran dirûşmeyên ‘’Bijî berxwedana Rojava”, ‘’Rojava wê ji faşîzmê e bibe goristan’’ û ‘’Kurdistan ji bo faşîstan goristan e’’ hatin berzkirin.
Teksta daxuyaniyê ji aliyê Rêveberê Navçeyê yê DEM Partiyê Nîhat Şahîn ve hate xwendin. Nîhat Şahîn diyar kir ku êrîşên li ser Rojava wê bandoreke neyînî li pêvajoya Aşitî û Civaka Demokratîk ya li Tirkiyeyê bike. Nîhat Şahîn piştre destnîşan kir ku têkilyên Tirkiyeyê yên li gel serokê HTŞ’ê ava kirine, rê li ber êrîşên li herêmê vekirine û anî ziman ku ev yek hem ji bo gelê Sûriyeyê û hem jî ji bo xakên Tirkiyeyê metirsiyek e.
Di dema çalakiyê de tevî mudaxeleyên polîsan jî girseya gel ji barîkatên polîsan derbas bû û meşa xwe domand. Protesto di nava demeke kurt de belav bûne kolanan û gelek kes hatin binçavkirin.
Li navçeya Bahçelîevlerê jî endamên DEM Partiyê daxuyaniyeke çapemeniyê dan û meşek li dar xistin. Beşdarvanan pankarta bi nivîsa; ‘’Rojava wijdan e, berxwedan e, azadî ye û nayê teslîmgirtin’’ vekir û dirûşmeyên; ‘’ Bijî berxwedana Rojava” û “Jin jiyan azadî” berz kirin. Teksta daxuyaniyê ji aliyê Endama Meclîsa Jinan a Stenbolê ya DEM Partiyê Fîlîz Peştek Keskîn ve hate xwendin. Fîlîz Peştek Keskîn bang li hêzên demokratîk ên navneteweyî, Neteweyên Yekbûyî û hemû dînamîkên civakî ên eleqedar kir ku bêdeng nemînin û berpirsiyariyan bigirin ser milên xwe.
