Hêzên Aştî û Demokrasiyê yên Kedê yê Stenbolê ji bo şermezarkirina operasyonên li dijî Kongreya Demokratîk a Gelan (HDK) û krîmînalîzekirina Lihevkirina Bajêr li ber Edliyeya Çaglayanê ya Stenbolê kom bûn û bi berzkirina dirûşma “Em bi milyonan in, em ê neyên mehkûmkirin” çalakî li dar xistin.
Hevberdevkên HDK’ê Meral Daniş Beştaş û Alî Kenanoglû, gelek nûnerên partiyên siyasî, sazî û sendîkayan beşdarî çalakiyê bûn.
Di çalakiyê de pankartên ”Wê desthilatdariya qesrê têk biçe”, “Kar, nan, azadî”, “Zext nikare me bêzar bike” hatin hilgirtin û bê navber dirûşmên “Qedexe yên we ne, têkoşîn ya me ye”, “Li dijî faşîzmê mil bi mil” hatin berzkirin.
Hevberdevka HDK’ê Meral Daniş Beştaş di çalakiyê de axivî û bal kişand operasyonan û got, “Em ê têkoşîna aştî û demokrasiyê mezin bikin.” Beştaş li ser binpêkirina mafan a di dema serdegirtinan de pêk hatin jî ev tişt anî ziman: “Lêgerîna tazî û çek kişandin sûcê herî mezin e.”
Alîkarê Serokê Giştî yê Partiya Kedê Levent Tuzel jî diyar kir ku ev darizandin siyasî ne û wiha axivî: “Aştî wê bi ser bikeve, demokrasî bi ser bikeve.”
Parlamenterê CHP’ê yê Stenbolê Alî Ekber Comert jî destnîşan kir ku hewl didin bi operasyonan rojeva welat a sereke biguherînin û got, “Em ji zextan natirsin, em ê têkoşîna xwe bidomînin.”
Akademîsyen Fatma Gok li ser armanca operasyonan got, “Kesên ku dixwazin vê sîstemê biguherînin tên darizandin.”
Yek ji damezrînerên HDK’ê Onur Hamzaoglû sedema hedefgirtina HDK’ê wiha nirxand: “Armanca destwerdana li HDK’ê ji bo pêşîgirtina aştî û komara demokratîk e.”
Endama Navenda Giştî ya HDK’ê Yagmur Yurtsever ku daxuyaniya hevpar a çapemeniyê xwend got, “Em şahidê têkoşîna ked, aştî û demokrasiyê ya hevalên xwe yên girtî ne û em xwedî li hevalên xwe derdikevin.”
Piştî daxuyaniyê, kesên ku navê wan di lêpirsînê de derbas dibin, ji bo îfadeyê bidin daxwazname dan dozgeriyê.
