Fermandariya Hêzên Hevpar ên girêdayî artêşê, hêzên paramîlîter bi kuştina zêdetirî 2 hezar welatiyên sivîl sûcdar kir. Fermandariyê da zanîn ku piraniya welatiyên ku di êrîşê de hatine kuştin jin, zarok û kesên temenmezin in.
Neteweyên Yekbûyî li herêmê hişyariya ‘’talûkeya komkujiya etnîkî’’ da û Laboratûwara Lêkolînên Însanî ya Zanîngeha Yaleyê (HRL) jî girêdayî dîmenên fezayê û vîdeoyan da zanîn ku ‘’înfazên girseyî’’ hatine kirin.
Bajarê El- Faşir ku ev 18 meh in di bin dorpêçê de ye, bû dawîn bajarê ku ketiye bin kontrola hêzên paramîlîter. Yekîtiya Efrîqayê jî piştî ku hêzên paramîlîter bajar xist bin kontrola xwe geşedanên ku rû dane weke ‘’sûcêli dijî mirovahiyê û sûcê şerî’’ pênase kirin.
Serokê Komîsyona Yekîtiya Efrîqayê Mahamud Ali Yusuf diya kir ku welatiyên sivîl ‘’ji ber etnîka wan hatine hedefgirtin’’ û diyar kir ku hiqûqa navneteweyî bi awayê herî giran hatiye binpêkirin.
KRÎZA MIROVÎ
Li gorî Rêxistina Koçberiyê ya Navneteweyî (IOM) di nava çend rojên dawîn de zêdetirî 26 hezar welatiyên sivîl ji bajarê El-Faşirê reviyane. Ji destpêka şerî heya niha jî zêdetirî 1 milyon kes ji cih û warên xwe bûne. Bijîjşkên Sînornenas (MSF) jî da zanîn ku li nexweşxaneyên herêmê gelek birîndar hene. Rêxistina Tenduristiyê ya Cîhanî (WHO) jî ragihand ku nexweşxaneya dawîn a bajêr jî bûye hedefa êrîşan, hin kedkarên tenduristiyê hatine kuştin û birîndarkirin.
Hêzên paramîlîter jî sûcdarî red kirin û îdîa kir ku wan ji bo parastina sivîlan û ewlehiyê ekîbên xwe şandine bajêr. Lê belê rêxistinên mafên mirovan ênli Sûdanê û Kolektîfa Parêzerên Lezgîn ev daxuyaniya hêzên paramîlîter derewandin û ew bi ‘’kirina sûcê şerî ya bi awayekî sîstematîk’’ sûcdar kirin.
Komkujiya ku li El-Faşirê pêk hatiye, weke yek ji mezintirîn beşeke bixwîn a şerê navxweyî yê Sûdanê tê nirxandin.
