7 rêyên sereke (Çerxerêya Leyremûn, Çerxerêya Cendul, Rêya Parkê, Çerxerêya Şîhan, Telet Eşrefiyê, Ewarid, Cizîrê) taxên Şêxmeqsûd û Eşrefiyê û taxên din ên Helebê bi hev ve girê didin.
1’ê Nîsana îsal di navbera Meclisa Giştî ya Taxên Şêxmeqsûd û Eşrefiyê û nûnerên hikumeta veguhêz ên Helebê de peymanek têkildarî her du taxan hatibû îmzekirin. Di çarçoveya pêkanîna peymanê de, 7 bendên kontrolê yên hevbeş ên di navbera hêzên ewlehiya giştî û Hêzên Ewlekariya Hundirîn ên her du taxan de li ser rêyên sereke hatin danîn.
Lê hêzên hikumeta demkî 77 caran peyman binpê kiriye; dron li ser her du taxan gerandin, sivîl li ser rêyan hatin revandin, cihên giştî wekî Nexweşxaneya Astoriyan veguherandin xalên leşkerî.
Beriya 2 rojan jî, hêzên hikumeta demkî bendên axê danîn. Di encama vê yekê de 30’ê Îlonê rêya Çerxerêya Leyremûn a li rojavayê Şêxmeqsûd û Eşrefiyê hate girtin. Duh jî rêya Çerxerêya Cendûn a li bakurê rojhilatê her du taxan hat girtin û xebatên bendên hevbeş ên li ser van her du rêyan sekinîn.
Ji ber girtina her du rêyan, bi taybetî erebeyên karkeran neçar man rêyên alternatîf bi kar bînin, ji ber ku her du rê, Herêma Karkeran a li derdora taxa Eşrefiyê, herêma Şiqêf a Pîşesaziyê bi taxa Şêxmeqsûdê ve û herêmên din ve girê didin.
Li ser vê yekê 5 rêyên sereke hîna aktîf in. Bendên hevbeş ên li ser her du rêyan hîna mîsyonên xwe pêk tînin. Lê tevgerên dawîn ên ji aliyê hêzên hikumeta veguhêz ve pirsên ‘gelo ev rê dê heya kengî girtî bimînin?’ çêdikin.
Meclisa Giştî ya Taxên Şêxmeqsûd û Eşrefiyê duh daxuyaniyek dabû. Di daxuyaniyê de hate diyarkirin ku rê nayê dayîn ku sotemenî derbasî her du taxan bibe.
