Em di demên weha re derbas bûn kû her yek ji wan wek efsaneyan werin vegotin. Em vegeriyan xwe, li rewşa xwe ya herî pak, bi rastiyek ku mirovatiyê vedigerîne civakê. Dema pêwîst bû me li ber xwe da, dema pêwîst bû me çiya’yan ji xwera kir war û stargeh. Agirê li van lûtkeyan, mîna agirê ku di hundirê mirov de dest pê dike, ev agir jî zihniyeta ku di zihniyetê de afirîbû şewitand. Bû dengek, di mejiyan de deng veda, di nav kurdan de şiyarbûn û di dijmin de bû sedema tirsê. Ev deng bi guleya yekem dest pê kir û îro jî wek paşerdhejê berdewam dike.
Newroz efsaneyek e ku hatina biharê sembolîze dike. Mizgîniya biharê ya ji bo Kurdan bixwe ye. Ew sedema kiras û fîstanên renga reng a keçan, şal û şapikên xortan û tilîlîya dayîkan e. Newroz nirxek bêhempa ye ku her sal hêviya jiyanê nû dike û ruh dide ji bo pêşerojên azad û aram. Sekn û helwesta Kawa’yan li dijî zilma Dehaq’e ne Newroz.
Zarokên agir û rojê, gelê Kurd ku di avabûna mirovahî û civakê de xwedî şopeke mezin e û gelê herî kevnar û qedîm ê Rojhilata Navîn e, ji bo parastina hebûna xwe û xwe bi nasnameya xwe, berxwedaneke bi heybet nîşan da ku di dîrokê de mînakên wê tune ye. Mazlûm Dogan, Kawayê hemdem, li ber Dehaqên zalim serî netewand û li hember vê zulmê serî hilda.
Rahşan, Bêrîvan, Ronahî, Zekiye û berîya wan, nîşan dan ku welatê Mezopotamyayê bi qasî gelên xwe yên zozanan, bi çiyayên xwe yên zelal û herikbar, serhildêr e û bi vî awayî bûn sembola azadiyê û di şexsê xwe de ev roj pîroz kirin. Ji ber ku dizanibûn jiyana bê azadî nabe jiyan, jiyan ancax bi azadiyê dikare wateyekê bibîne, eger nebe wê bibe îxaneta jiyanê. Ji ber vê sedemê bedelê azadiyê çiqasî bilind bû jî hêjayî dayina wê bû. Dema ku gelê Kurd bi roj jî di tariyê de bû, bi saya van lehengan îro gelê Kurd ronahîyê dibîne. Bi vê berxwedanê re ku li Kurdistanê jiyaneke nû şîn bû, gelê ku ji lingên desthilatdaran jî ditirsiya, niha bi cesaret û îradeyeke mezin li hemberî van desthilatdarên ku dixwestin vî gelî tine bikin, li ber xwe didin û di heman demê de dibin dengê hemû gelên bindest.
Lêgerînên heqîqetê bi bedelên giran azadiyê distînin. Dizanin ku jiyan bêyî ku xwe ji doza azadiyê re feda nekî bi wate nabe. Xwedîderketina wan a mezin ber bi ruhekî mezin ê têkoşîn û berxwedanê ve dibe. Ev ruh li hemû cîhanê belav dibe. Tekoşerên azadiyê cesaretê didin gelên ku bi salan di bin nasnameyên cuda de dijîn û newêrin ji xwe re jî bibêjin ew kî ne. Ji bo jinên ji hebûn, cewher û nirxên xwe hatine qutkirin mizgîniya azadî, serxwebûn, xwe û vîna xwe dide. Hêviya pêşerojeke nû dide gelek kesên ku berê li dîasporayê bûne û neçar mane ku dev ji warên xwe berdin û koçber bibin û ev hêviya wan ji nû ve geş dike. Ew xewnên zarokên ku dixwazin di cîhanek paqij de bijîn pêk tîne. Ev hêviyê dide kal û pîrên ku li hemberî êrîşên ku hatine jiyan kirin hêviya xwe winda kirine kû rojekê be jî li Kurdistana azad bijîn. Mizgîniya hevdîtina bi Rêber Apo re tîne. Newroza 2025’an azadiya Rêber Apo diqîre.
Û îro Newroz dibe bihara hêvî û bawerîyê. Bihar gulên azadiyê şîn dike. Kurdên azad bi hêvî û bawerîya “Rêbertiya Azad Civaka Demokratîk” hemû lîstikan xera dikin. Em kurd bibin agir û bindestiyê bişewitînin, keleha Dehaqê kû li dor me xwe pêçandiye birûxînin dilên xwe bi nirxên rûmet û azadiyê û cewhera agir ve bînin cem hev. Bi ruhê Kawayê Hesinkar heta Mazlum Doganan asta têkoşîna xwe bilind bikin û Newroza îsal a ku ev pêncî sale bi vejîna kurdan wetadar dibe bikin Newroza Azadîya fizîkî a Rêber Apo!
