Di merasîma bîranînê ya li Lijneya Giştî ya Meclisê hate lidarxistin de wêneyên Onder bi singê xwe vekirin.
Wêneyê Onder ê bi qurnefîlan hatibû xemilandin danîn beşa Koma DEM Partiyê. Bîranîn bi rêzgirtinê dest pê kir. Piştre jî Serokwekîlê Meclisê yê AKP’î Bekîr Bozdag axivî û sersaxî xwest. Bozdag diyar kir ku ew ji ber wefata Onder gelek xemgîn bûne û got: “Feraseta siyaseta lihevkirinê ji xwe re kiribû rêgezek û ev şexsiyeta wî ji hêla gelek derdorên cuda ve dihat hezkirin. Mirovekî mustesna bû.”
Serokwekîlê Koma Partiya Yenî Yolê Mehmet Emîn Ekmen jî got: “Di demên herî krîtîk de jî bi kenê xwe ji nişka ve her tişt diguherand. Hêvîdarim weke mîrateya wî ev pêvajo di demekî herî kin de bê temamkirin. Bedena xwe, tenduristiya xwe fedayî vê pêvajoyê kir.”
Serokwekîlê Koma Partiya Îyiyê Bugra Kavuncu jî sersaxî ji malbata Onder û DEM Partiyê re xwest.
Serokwekîlê Koma MHP’ê Erkan Akça jî got ew gelek xemgînin û wiha domand: “Bi têkoşîna xwe ya ji bo aştî, aramî û biratiya welat dê her tim di hafizeya me de cih bigire. Hewldan û fedakariya wî ya ji bo bêdengbûna çekan, nîşaneya herî şênber a pêşeroja Tirkiyeyê ya aram û aştiyane ye.”
Serokwekîlê Koma CHP’ê Mûrat Emîr jî sersaxî xwest û got ku ew gelek xemgîn in. Emîr, got: “Kesayetiya wî ya demokrat li pêş bû. Rêznameya navxweyî bi adilane bicih di anî. Mirovî tu caran guman ji edaleta wî nedibir. Di dema krîz û rageşiyan de heke peywirdar nebûya jî dihat odeyê û rewşa heyî hinek aram dikir. Valahiya wî li pey xwe hiştî dê tije nebe.”
Serokwekîlê Koma AKP’ê Emîn Akbaşoglû jî got: “Bîranîneke mezin, kêliyên gelek xweş di dil û mejiyê me tevan de hişt.”
Serokwekîla Koma DEM Partiyê Gulistan Kiliç Koçyîgît jî got Onder bi milyonan kes aniye cem hev û got: “Dema dijiya ev yek kir. Ji derdê her kesî re xem xwar. Ji gelên vî welatî bawer kir. Ji bo aştiya gelan xebitî. Ewladekî egîd ê Anatoliya û Tirkmenan bû. Dostê Kurdan bû. Ji bo aştiya Kurd û Tirkan, tevî pirsgirêkên tenduristiyê jî bi şev û roj xebitî. Digot ‘Em ê îcar bi ser kevin.’ Bila soza me ya ji bo wî be ku em ê aştiyê bînin vî welatî û Tirkiyeke demokratîk ava bikin.”
Serokwekîlê Koma DEM Partiyê Sezaî Temellî got: “Ji vê Meclisê Sirri Sureyya Onder derbas bû. Ji vî welatî Sirri Sureyya Onder derbas bû. Belê derbas bû û şopên pir kûr li pey xwe hişt. Ew şop jî bi têkoşîna aştiyê ava kir. Em baş dizanin ku ew şop dê tu caran jê neçin. Em dizanin ku ew şop dê rê nîşanî hemû kesên ji bo aştiya vî welatî têdikoşin bidin.”
