Li gorî malpera fermî ya parêzgehê, Parêzgarê Hesekê Nûredîn Ehmed komek tedbîrên pratîkî yên bi rêya saziyên parêzgehê ragihand ku armanca wan zêdekirina îstîqrara xizmetguzarî, îdarî û hêsankirina tevgera welatiyan e.
Parêzgar da zanîn ku piştî ku tedbîrên pêwîst ji bo ewlekarî û misogeriya selametiya tevgera çûnûhatinê û rêkûpêkiya wan hatin temamkirin dê roja yekşemê hemû rêyên ber bi bajarê Hesekê ve bên vekirin.
Parêzgar da zanîn ku roja şemiyê (20 Sibat) şandeyek teknîkî ji Şamê tê ji bo ku xebatên jinûve vekirina Balafirgeha Navneteweî ya Qamişloyê temam bike û dîsa bikeve xizmetê.
Nûredîn Ehmed destnîşan kir ku komîteyeke pispor li ser pêvajoya entegrasyona saziya giştî ya bazirganî û hilberîna dexlûdan çavdêriyê dike û karmendên berê hatine derxistin li gorî rêzikên qanûnî vegeriyane karê xwe.
Parêzgar diyar kir ku wê sibe, şemiyê, komek ji girtiyan were berdan û dê rêwîtiyên bejayî yên navbera Hesekê û Şamê jî jinûve werin destpêkirin, da ku têkilî, tevgera welatiyan û kelûpelan hêsantir bibe.
Parêzgar Nûredîn Ehmed daxuyand ku ji bo jinûve aktîvkirina tevahî beşên xizmetguzariyê ku pêdiviyên şêniyan dabîn bikin, îstîqrara îdarî û xizmetguzarî xurttir bikin, dê qonaxa bê bi rêya saziyên parêzgehê bêtir gavên pratîkî bi xwe re bîne.
